ബൈക്കിന് പിന്നിലിരുന്ന യാത്രക്കാരന് ഹൃദയാഘാതം ; കോട്ടയം സ്വദേശിയായ യുവാവിന് ഗുരുതരപരിക്ക്

കട്ടപ്പന: ബൈക്കിന് പിന്നിലിരുന്ന യാത്രക്കാരൻ ഹൃദയാഘാതത്തെ തുടർന്ന് റോഡിലേക്ക് തെറിച്ചുവീണ് ഗുരുതരാവസ്ഥയില്‍.

കോട്ടയം സ്വദേശി അജോമോനാണ് (34) വീണ് പരിക്കേറ്റത്.

ചൊവ്വാഴ്ച രാവിലെ അടിമാലി-കുമളി ദേശീയപാതയില്‍ വെള്ളയാംകുടി ജങ്ഷന് സമീപമായിരുന്നു അപകടം. സുഹൃത്തിന്‍റെ പിന്നിലിരുന്ന അജോ മോന് ബൈക്ക് ഓടിക്കൊണ്ടിരിക്കെയാണ് ഹൃദയാഘാതമുണ്ടായത്.

അപകടം കണ്ട് എത്തിയവർ ഉടൻ കട്ടപ്പനയിലെ സ്വകാര്യ ആശുപത്രിയില്‍ പ്രവേശിപ്പിച്ചു. നില ഗുരുതരമായതിനാല്‍ തീവ്രപരിചരണ വിഭാഗത്തിലേക്ക് മാറ്റി. കട്ടപ്പനയിലെ സ്വകാര്യ സ്ഥാപനത്തിലെ ജീവനക്കാരനാണ് അജോമോൻ.