ശക്തമായ കാറ്റില്‍ മരം വീണ് തിരുവല്ലയിലെ നെടുമ്ബ്രത്ത് വീട് പൂര്‍ണമായും തകര്‍ന്നു. നെടുമ്പ്രം സ്കറിയ എബ്രഹാമിന്‍റെ വീടാണ് തകര്‍ന്നത്.

സ്വന്തം ലേഖകൻ

തിരുവല്ല:ഇന്നലെ രാത്രി 10 മണിയോടെയായിരുന്നു സംഭവം. വീശിയടിച്ച കാറ്റില്‍ സ്കറിയ എബ്രഹാമിന്‍റെ തന്നെ പുരയിടത്തില്‍ നിന്നിരുന്ന ആഞ്ഞിലി മരം വീടിന് മുകളിലേക്ക് വീഴുകയായിരുന്നു.

വീടിന്‍റെ രണ്ടു മുറികള്‍ പൂര്‍ണമായും തകര്‍ന്നു. അടുക്കളയുടെ ഭിത്തി വിണ്ട് കീറി.

മേല്‍ക്കൂര തകരുന്ന ഒച്ചകേട്ട് സ്കറിയ എബ്രഹാമിന്‍റെ ഭാര്യയും മകനും പിൻവാതിലിലൂടെ പുറത്തേക്ക് ഓടി രക്ഷപ്പെട്ടതിനാല്‍ ആളപായം സംഭവിച്ചില്ല.

ഇന്ന് രാവിലെ പത്തു മണിയോടെ റവന്യൂ അധികൃതര്‍ സ്ഥലത്തെത്തുമെന്ന് വാര്‍ഡ് മെമ്പർ പറഞ്ഞു.