ഡൽഹി : ഓഹരി വിപണിയില് വന് മുന്നേറ്റം. 400ഓളം പോയിന്റ് ആണ് വ്യാപാരത്തിന്റെ തുടക്കത്തില് ബിഎസ്ഇ സെന്സെക്സ് മുന്നേറിയത്. നിഫ്റ്റിയിലും വലിയ മുന്നേറ്റമാണ് ദൃശ്യമാകുന്നത്. കുറഞ്ഞ വിലയ്ക്ക് ഓഹരി ലഭിക്കുമെന്ന കണക്കുകൂട്ടലില് നിക്ഷേപകര് സ്റ്റോക്കുകള് വാങ്ങിക്കൂട്ടുന്നതാണ് ഇന്നത്തെ മുന്നേറ്റത്തിന് കാരണമെന്ന് വിപണി വിദഗ്ധര് പറഞ്ഞു.
ഐടി, ബാങ്ക് ഓഹരികള് നഷ്ടം നേരിടുമ്പോള് ഓട്ടോ ഓഹരികള് ചെറിയ നേട്ടത്തിലാണ്. പ്രധാനമായി നേട്ടം ഉണ്ടാക്കുന്നത് റിലയന്സ്, ഹീറോ മോട്ടോകോര്പ്പ്, എച്ച്ഡിഎഫ്സി ബാങ്ക്, ഭാരതി എയര്ടെല്, ടാറ്റ മോട്ടോഴ്സ് ഓഹരികളാണ്. ഇന്ഫോസിസ്, അള്ട്രാടെക് സിമന്റ്, മാരുതി സുസുക്കി, ഡോ. റെഡ്ഡീസ് ലാബ്, എംആന്റ്എം ഓഹരികളാണ് പ്രധാനമായി നഷ്ടം നേരിടുന്നത്.
രൂപയുടെ മൂല്യം ഡോളറിനെതിരെ ഇടിയുന്നത് തുടരുന്നു. ആറു പൈസയുടെ നഷ്ടത്തോടെ 88.16 എന്ന നിലയിലാണ് രൂപയുടെ വിനിമയം. വിദേശ നിക്ഷേപത്തിന്റെ പുറത്തേയ്ക്കുള്ള ഒഴുക്കും ഡോളര് ആവശ്യകത വര്ധിച്ചതുമാണ് രൂപയുടെ മൂല്യം ഇടിയാന് കാരണം. ഇന്നലെ 88.10 എന്ന റെക്കോര്ഡ് താഴ്ചയിലാണ് രൂപ ക്ലോസ് ചെയ്തത്. എണ്ണവിലയും ഉയരത്തിലാണ്. ബ്രെന്ഡ് ക്രൂഡിന്റെ വിലയില് 0.44 ശതമാനത്തിന്റെ വര്ധനയാണ് രേഖപ്പെടുത്തിയത്. സ്വര്ണത്തിന്റെ വിലയും കുതിച്ചുയരുകയാണ്. ഇന്ന് പവന് 160 രൂപ വര്ധിച്ച് 78,000ത്തോട് അടുത്തിരിക്കുകയാണ് സ്വര്ണവില.
Whatsapp Group 1 | Whatsapp Group 2 |Telegram Group