സംസ്ഥാന സ്കൂൾ കായിക മേള: സമാപന ദിനമായ ഇന്ന് 18 ഫൈനലുകൾ; ഗെയിംസ് ഇനങ്ങളിൽ 144 സ്വർണമടക്കം 1213 പോയിന്റുമായി തിരുവനന്തപുരം ഒന്നാം സ്ഥാനത്ത്; വൈകിട്ട് നാലിന് സമാപന ചടങ്ങിൽ മുഖ്യമന്ത്രി മുഖ്യാതിഥിയാവും; എറണാകുളം വിദ്യാഭ്യാസ ജില്ലയിലെ കേരള സിലബസ് പ്രകാരമുള്ള എല്ലാ സ്കൂളുകൾക്കും ഇന്ന് അവധി

കൊച്ചി: സംസ്ഥാന സ്കൂൾ കായിക മേളയുടെ അവസാന ദിനമായ ഇന്ന് 18 ഫൈനലുകൾ. ക്രോസ് കൺട്രിയോടെയാണ് ഇന്നത്തെ മത്സരങ്ങൾക്ക് തുടക്കമാവും. സീനിയർ ആൺകുട്ടികളുടെ ഹാമർ ത്രോയാണ് ഫീൽഡിലെ ആദ്യ ഫൈനൽ.

ഉച്ചയ്ക്ക് രണ്ടിന് ആരംഭിക്കുന്ന 200 മീറ്റർ ഫൈനലുകൾക്ക് ശേഷം 400 മീറ്റർ റിലേ മത്സരങ്ങളും നടക്കുന്നതോടെ ഈ വർഷത്തെ കൗമാര കായിക മേളയ്ക്ക് അവസാനമാകും. 78 ഇനങ്ങൾ പൂർത്തിയായപ്പോൾ 66 പോയിന്‍റുമായി മലപ്പുറം ഐഡിയൽ കടകശേരി സ്കൂൾ കിരീടം ഉറപ്പിച്ച് കഴിഞ്ഞു. തുടർച്ചയായ മൂന്നാം തവണയാണ് ഐഡിയൽ സ്കൂൾ ഒന്നാംസ്ഥാനത്ത് എത്തുന്നത്.

19 സ്വർണമടക്കം 192 പോയിന്‍റുമായി മലപ്പുറം ഒന്നാം സ്ഥാനത്ത് തുടരുകയാണ്. 38 പോയിന്‍റുള്ള കോതമംഗലം മാർ ബേസിൽ സ്കൂളാണ് രണ്ടാം സ്ഥാനത്ത്. ജില്ലകളിൽ 169 പോയിന്‍റുള്ള, നിലവിലെ ചാമ്പ്യൻമാരായ പാലക്കാട് രണ്ടാം സ്ഥാനത്താണ്. ഗെയിംസ് ഇനങ്ങളിൽ 144 സ്വർണമടക്കം 1213 പോയിന്റുമായി തിരുവനന്തപുരം ജില്ല വളരെ മുന്നിലാണ്. ഓവറോൾ കിരീടവും തിരുവനന്തപുരം ഉറപ്പിച്ചു.

വൈകിട്ട് നാലിന് സമാപന ചടങ്ങുകൾ തുടങ്ങും. മുഖ്യമന്ത്രി പിണറായി വിജയൻ മുഖ്യാതിഥിയാവും. സ്കൂൾ കായിക മേളയുടെ സമാപനം കണക്കിലെടുത്ത് എറണാകുളം വിദ്യാഭ്യാസ ജില്ലയിലെ കേരള സിലബസ് പ്രകാരമുള്ള എല്ലാ സ്കൂളുകൾക്കും ഇന്ന് ജില്ലാ കളക്ടർ അവധി പ്രഖ്യാപിച്ചു.