സംസ്ഥാനത്ത് കാലവര്‍ഷം കനക്കുന്നു; കോട്ടയം ഉൾപ്പെടെ പത്ത് ജില്ലകളില്‍ യെല്ലോ അലര്‍ട്ട്; പലയിടത്തും വൻ നാശനഷ്ടം

സ്വന്തം ലേഖിക

തിരുവനന്തപുരം: സംസ്ഥാനത്ത് മഴ കനക്കുന്നു.

നാളെ 10 ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍, കോഴിക്കോട്, കണ്ണൂര്‍ എന്നീ ജില്ലകളിലാണ് മഴ മുന്നറിയിപ്പ്.

അതേസമയം, സംസ്ഥാനത്ത് കനത്ത മഴയില്‍ പലയിടത്തും നാശനഷ്ടമുണ്ടായി. തിരുവനന്തപുരം മുതലപ്പൊഴിയില്‍ വള്ളം മറിഞ്ഞ് അപകടത്തില്‍പ്പെട്ട 8 മത്സ്യത്തൊഴിലാളികളെ രക്ഷപ്പെടുത്തി.

ഒരാഴ്ചയ്ക്കിടെ രണ്ടാം തവണയാണ് മുതലപ്പൊഴിയില്‍ വള്ളം മറിയുന്നത്. ചൊവ്വാഴ്ച രാവിലെ 3 മണിയോടെയാണ് അപകടം.

അപകടത്തില്‍പ്പെട്ട വള്ളത്തിലെ മത്സ്യതൊഴിലാളികളെ രക്ഷപ്പെടുത്തുന്നതിനിടെ രണ്ടാമത്തെ വള്ളവും മറിഞ്ഞു. കോസ്റ്റല്‍ പൊലീസും, മറൈൻ എൻഫോഴ്‌സ്‌മെന്റുമാണ് രക്ഷാപ്രവര്‍ത്തനം നടത്തിയത്.