പിരിവിന് ഇറങ്ങിയില്ലെന്ന് ആരോപിച്ച്  ഡിഗ്രി വിദ്യാർത്ഥിയ്ക്ക് എസ്.എഫ്.ഐ യൂണിറ്റ് സെക്രട്ടറിയുടെ നേതൃത്വത്തിൽ ക്രൂരമർദ്ദനം ; വിദ്യാർത്ഥിയെ മർദ്ദിച്ചത് 15 മണിക്കൂർ മുറിയിൽ പൂട്ടിയിട്ട് : വിവസ്ത്രനാക്കി ഫോട്ടോ എടുത്തുവെന്നും ആരോപണം

സ്വന്തം ലേഖകൻ

കൊച്ചി: എസ്.എഫ്.ഐയുടെ പിരിവിന് ഇറങ്ങിയില്ലെന്ന് ആരോപിച്ച് മഹാരാജാസ് കോളേജിൽ ഒന്നാം വർഷ വിദ്യാർത്ഥിയെ എസ് എഫ് ഐ പ്രവർത്തകരുടെ നേതൃത്വത്തിൽ റാഗ് ചെയ്തതായി പരാതി. ഒന്നാം വർഷ മലയാള വിഭാഗം വിദ്യാർത്ഥിയും മലപ്പുറം സ്വദേശിയുമായ റോബിനാണ് എസ്.എഫ്.ഐ പ്രവർത്തകരുടെ ക്രൂരമർദ്ദനത്തിന് ഇരയായത്.

വെളളിയാഴ്ച രാത്രി എട്ട് മണി മുതൽ ശനിയാഴ്ച രാവിലെ 11 മണിവരെ എസ് എഫ് ഐ യൂണിറ്റ് സെക്രട്ടറിയടക്കമുളളവരുടെ നേതൃത്വത്തിലായിരുന്നു റാഗിംഗ്.എസ് എഫ് ഐക്കാർ റോബിനെ ഹോസ്റ്റൽ മുറിയിൽ പൂട്ടിയിടുകയായിരുന്നു. തുടർന്ന് മർദിക്കുകയും വിവസ്ത്രനാക്കി ഫോട്ടോ എടുക്കുകയും ചെയ്തുവെന്നാണ് പരാതിയിൽ പറയുന്നത്.

ഇരുമ്പ് വടി കൊണ്ട് റോബിന്റെ കാൽ മുട്ടിലടക്കം മർദിച്ചിട്ടുണ്ട്. ഭക്ഷണം നൽകുകയോ രാത്രിയിൽ ഉറങ്ങാൻ സമ്മതിക്കുകയോ ചെയ്തില്ലെന്നും റോബിൻ പറയുന്നു. എസ് എഫ് ഐ പ്രവർത്തകർക്ക് പുറമെ കോളേജിന് പുറത്തുനിന്നുളളവരും സംഘത്തിലുണ്ടായിരുന്നതായും ആരോപണമുണ്ട്.

സംഭവത്തിൽ എറണാകുളം സെൻട്രൽ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. പൊലീസിൽ പരാതി നൽകിയാൽ വേറെ കേസിൽ കുടുക്കുമെന്ന് പറഞ്ഞായിരുന്നു റാഗിംഗ് നടത്തിയതെന്നാണ് റോബിന്റെ സുഹൃത്ത് പറയുന്നു.