വാക്കേറ്റമുണ്ടായതിനെ തുടര്‍ന്ന് സെക്യൂരിറ്റി ജീവനക്കാര്‍ തമ്മില്‍ കത്തിക്കുത്ത്; ഒരാള്‍ക്ക് ഗുരുതര പരിക്ക്; പ്രതി അറസ്റ്റിൽ

കോഴിക്കോട്: കോഴിക്കോട് ടൗണില്‍ സെക്യൂരിറ്റി ജീവനക്കാർ തമ്മില്‍ കത്തിക്കുത്ത്.

സംഭവത്തില്‍ ഒരാള്‍ക്ക് ഗുരുതര പരിക്കേറ്റു. കോഴിക്കോട് മാവൂർ ശ്മശാനം റോഡിലായിരുന്നു സംഭവം.

ഇന്ന് പുലർച്ചെ 3.30-നായിരുന്നു സെക്യൂരിറ്റി ജീവനക്കാർ തമ്മില്‍ വാക്കേറ്റമുണ്ടായത്. തുടർന്ന് കത്തിക്കുത്തില്‍ കലാശിക്കുകയായിരുന്നു. ഇരുവരും തമ്മില്‍ ഇതിനുമുൻപും പ്രശ്‍നങ്ങള്‍ ഉണ്ടായിട്ടുണ്ട്.

കുത്തേറ്റ കണ്ണൂർ സ്വദേശി ജോസഫ് മെഡിക്കല്‍ കോളേജില്‍ ചികിത്സയിലാണ്. ഇയാള്‍ക്ക് വയറിന് ആഴത്തില്‍ കുത്തേറ്റിട്ടുണ്ട്.

പ്രതി കൊല്ലം സ്വദേശി ഷാനവാസ് ഷാജഹാനെ നടക്കാവ് പൊലീസ് അറസ്റ്റ് ചെയ്തു. സംഭവത്തില്‍ പ്രതിയെ വിശദമായി ചോദ്യം ചെയ്ത് വരികയാണ്.