വീണ്ടും ജില്ലയിൽ ജലാശയങ്ങൾ അപകടക്കുഴിയൊരുക്കുന്നു: നീന്തലറിയാമെന്ന അമിത ആവേശത്തിൽ ഒരാഴ്ചയ്ക്കിടെ ആറിന്റെ ആഴങ്ങളിലേയ്ക്ക് വീണു മരിച്ചത് അഞ്ചു പേർ; നാലു വിദ്യാർത്ഥികൾ അടക്കം അഞ്ചു പേർക്ക് മരണം വിധിച്ച് ആഴങ്ങൾ

സ്വന്തം ലേഖകൻ

കോട്ടയം: കഴിഞ്ഞ പത്തു ദിവസത്തിനിടെ മീനച്ചിലാറിന്റെ ആഴങ്ങളിൽ വീണ് മരിച്ചത് അ്ഞ്ചു പേർ. വിദ്യാർത്ഥികളായ മൂന്നു സഹപാഠികളുടെ ജീവനടക്കമാണ് ആറെടുത്തത്. കഴിഞ്ഞ ദിവസം മീനച്ചിലാറ്റിൽ കുളിക്കാനിറങ്ങി കാണാതായ  കടപ്പാട്ടൂർ പേരൂർ പി എസ് ഷാജിയുടെ (ഹരിക്കുട്ടൻ 58) മൃതദേഹം കൂടി കണ്ടു കിട്ടിയതോടെ ഒൻപത് ദിവസത്തിനിടെ അ്്ഞ്ചു പേരാണ് മീനച്ചിലാറ്റിൽ മുങ്ങി മരിച്ചിരിക്കുന്നത്.

നവംബർ പത്തിനായിരുന്നു നാടിനെ നടുക്കിയ ദുരന്തങ്ങളുടെ തുടക്കം. ആർപ്പൂക്കര ഗവ.വി.എച്ച്.എസ്.എസിലെ പ്ലസ്ടു വിദ്യാർത്ഥി അതിരമ്പുഴ താന്നിക്കൽ ഷിയാസിന്റെ മകൻ അഷിക്കാണ് (16) കഴിഞ്ഞ ആഴ്ച കിടങ്ങൂർ കാവാലിപ്പുഴയിൽ മുങ്ങി മരിച്ചത്. നവംബർ പത്തിനായിരുന്നു ദാരുണമായ അപകടമുണ്ടായത്.

തുടർന്ന് കഴിഞ്ഞ വെള്ളിയാഴ്ചയായിരുന്നു നാടിനെ നടുക്കിയ ദാരുണ ദുരന്തമുണ്ടായത്. പുതുപ്പള്ളി ഐ.എച്ച്.ആർ.ഡിയിലെ പ്ലസ്ടു വിദ്യാർത്ഥികളായ വടവാതൂർ കുന്നമ്പള്ളി കെ.കെ പ്രസാദിന്റെയും ബിജിയുടെയും മകൻ അശ്വിൻ കെ.പ്രസാദ് (17), ചിങ്ങവനം കേളചന്ദ്രപറമ്പിൽ കെ.സി ചാക്കോയുടെയും സൂസമ്മയുടെയും മകൻ അലൻ (17), മീനടം കൊടുവള്ളിമാക്കൽ കെ.സി ജോയിയുടെയും ഷീബയുടെയും മകൻ ഷിബിൻ ജേക്കബ് (17) എന്നിവരാണ് പാറമ്പുഴ പൂവത്തുമ്മൂട് കടവിൽ തൂക്ക് പാലം കാണാൻ പോയി മുങ്ങി മരിച്ചത്.

ചൊവ്വാഴ്ചയായിരുന്നു പാലായിൽ അടുത്ത മുങ്ങി മരണം ഉണ്ടായത്. ഇതും മീനച്ചിലാറ്റിൽ തന്നെയായിരുന്നു. മീനച്ചിലാറ്റിൽ കടപ്പാട്ടൂർ ക്ഷേത്രക്കടവിൽ കുളിക്കാനിറങ്ങിയ ഹരിക്കുട്ടനെ കാണാതാകുകയായിരുന്നു. സുഹൃത്ത് സുരേഷിനൊപ്പം കടവിൽ ഇറങ്ങിയ ഷാജി ആറിന് കുറുകെ നീന്തുന്നതിനിടെ കാണാതാകുകയായിരുന്നു. പാലാ ഫയർഫോഴ്‌സും പൊലീസും സ്ഥലത്തെത്തി. ഫയർഫോഴ്‌സ് സംഘം ‘ഡിങ്കി’യിൽ തെരച്ചിൽ നടത്തിയെങ്കിലും ആളെ കണ്ടു കിട്ടിയില്ല.

അരുണാപുരം പാസ്റ്ററൽ ഇൻസ്റ്റിട്യൂട്ടിന് സമീപം പാലക്കയത്തിൽനിന്ന് ചൊവ്വാഴ്ച രാത്രി എട്ടോടെ നാട്ടുകാരാണ് മൃതദേഹം കണ്ടെടുത്തത്. വിവരം അറിഞ്ഞ് പാലാ പൊലീസ്, ഫയർഫോഴ്‌സ് സംഘം എത്തി.  പാലാ സിഐ വി എ സുരേഷിന്റെ  നേതൃത്വത്തിൽ മൃതദേഹം പാലാ ജനറൽ ആശുപത്രി മോർച്ചറിയിലേക്ക് മാറ്റി. സംസ്‌കാരം ബുധനാഴ്ച വീട്ടുവളപ്പിൽ. ഭാര്യ: തങ്കമ്മ. മക്കൾ: സരിത, ഹരികൃഷ്ണൻ. മരുമകൻ: പ്രദീപ് (ചിറക്കടവ്).