‘കുട്ടികള്‍ക്കെതിരായ അതിക്രമം വെച്ചുപൊറുപ്പിക്കില്ല; മന്ത്രിയായ ശേഷം ഒൻപത് അധ്യാപകരെ പിരിച്ചുവിട്ടു’; ഇനിയും ശക്തമായ നടപടിയുണ്ടാകുമെന്ന് വിദ്യാഭ്യാസ മന്ത്രി

തിരുവനന്തപുരം: സ്കൂളുകളില്‍ വിദ്യാർഥികള്‍ക്കെതിരായ അക്രമങ്ങളില്‍ ശക്തമായ നടപടിയുണ്ടാകുമെന്ന് വിദ്യാഭ്യാസ മന്ത്രി വി ശിവൻകുട്ടി.

കുട്ടികള്‍ക്കെതിരെ നടക്കുന്ന അതിക്രമം വെച്ചുപൊറിപ്പിക്കില്ലെന്നും താൻ മന്ത്രിയായതിനു ശേഷം ഒൻപത് അധ്യാപകരെ പിരിച്ചുവിട്ടുവെന്നും മന്ത്രി പറഞ്ഞു. കേരളാ പോലീസ് സീനിയർ ഓഫീസേഴ്സ് അസ്സോസിയേഷൻ തിരുവനന്തപുരം ജില്ലാകമ്മിറ്റി സംഘടിപ്പിച്ച സുരക്ഷ – Meet the Students പരിപാടി ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.

പ്രഥമാധ്യാപകന്റെ അടിയേറ്റ് കാസർകോട് ജിഎച്ച്‌എസ്‌എസ് കുണ്ടംകുഴിയിലെ 10-ാം ക്ലാസ് വിദ്യാർഥിയുടെ വലതു കർണപടം തകർന്ന സംഭവത്തില്‍ വിദ്യാഭ്യാസ ഉപഡയറക്ടർ അന്വേഷണ റിപ്പോർട്ട് സമർപ്പിച്ചിരുന്നു. സംഭവത്തില്‍ പ്രഥമാധ്യാപകൻ എം. അശോകനെതിരേ ബേഡകം പോലീസ് കേസെടുത്തിട്ടുണ്ട്.

തിങ്കളാഴ്ച ഉച്ചയ്ക്ക് രണ്ടോടെ വിദ്യാർഥിയുടെ വീട്ടിലെത്തി പോലീസ് വിവരം ശേഖരിച്ചതിന്റെ അടിസ്ഥാനത്തിലാണ് കേസ്. ബാലാവകാശ കമ്മിഷനും സ്വമേധയാ കേസെടുത്തിട്ടുണ്ട്.