സ്‌കൂൾ ബസ് സാമൂഹിക വിരുദ്ധർ കത്തിച്ചു: 7 ബസുകൾ അടിച്ചു തകർത്തു; പോലീസ് അന്വേഷണം ആരംഭിച്ചു

തിരുവനന്തപുരം : കാഞ്ഞിരംകുളത്ത് സ്വകാര്യ സ്‌കൂളിനെതിരെ ആക്രമണം. കാഞ്ഞിരംകുളം ലൂർദ് മൗണ്ട് കാർമൽ റസിഡൻഷ്യൽ സ്‌കൂളിന് നേരെയാണ് അക്രമണമുണ്ടായത്. ആക്രമണത്തിന്റെ കാരണവും പിന്നിലുള്ളത് ആരാണെന്നും വ്യക്തമല്ല.

ഇന്നലെ രാത്രിയാണ് അക്രമം നടന്നത്. സ്‌കൂളിലെ ഒരു ബസ് കത്തിച്ചു. 7 ബസ്സുകൾ അടിച്ചു തകർത്തിട്ടുണ്ട്. എസി ബസാണ് കത്തിച്ചത്. ലക്ഷക്കണക്കിന് നഷ്ടം ഉണ്ടായിട്ടുണ്ടെന്നാണ് കണക്കാക്കുന്നത്.

സംഭവത്തെ തുടർന്ന് സ്കൂളിന് ഇന്ന് അവധി പ്രഖ്യാപിച്ചിട്ടുണ്ട്.പോലീസ് അന്വേഷണം ആരംഭിച്ചു. ഫോറൻസിക് സംഘം സ്ഥലത്തെത്തി പരിശോധന നടത്തും.

സി.സി.ടി.വി ഉള്‍പ്പെടെയുള്ളവ പരിശോധിച്ച് കൂടുതല്‍ അന്വേഷണം നടത്തിയാല്‍ മാത്രമേ സംഭവത്തിന്റെ വിശദാംശങ്ങള്‍ അറിയാനാകൂവെന്ന് പൊലീസ് അറിയിച്ചു. മുഴുവന്‍സമയവും സെക്യൂരിറ്റി ജീവനക്കാര്‍ ഉള്ള സ്‌കൂളിലാണ് ഈ അതിക്രമം നടന്നത്.