കോട്ടയം ജില്ലയിലെ സർക്കാർ ഓഫീസുകളിലും സ്ഥാപനങ്ങളിലും നടക്കുന്ന ഓണാഘോഷ പരിപാടികൾ പൂർണ്ണമായും ഹരിതചട്ടം പാലിച്ചു നടപ്പാക്കാൻ തീരുമാനം:ഭക്ഷണ സാമഗ്രികൾ നൽകുമ്പോൾ ഡിസ്‌പോസിബിൾ വസ്തുക്കൾ പാടില്ല

കോട്ടയം: ജില്ലയിലെ സർക്കാർ ഓഫീസുകളിലും സ്ഥാപനങ്ങളിലും നടക്കുന്ന ഓണാഘോഷപരിപാടികൾ പൂർണമായും ഹരിതചട്ടം പാലിച്ചു നടപ്പാക്കാൻ ജില്ലാ കളക്ടർ ചേതൻ കുമാർ മീണയുടെ അദ്ധ്യക്ഷതയിൽ ചേർന്ന യോഗത്തിൽ തീരുമാനം. ഓണാഘോഷങ്ങളോടനുബന്ധിച്ചു നടത്തുന്ന പരിപാടികളിൽ മാലിന്യം പരമാവധി കുറയ്ക്കാൻ എല്ലാവരുടേയും സഹകരണം ഉണ്ടാകണമെന്ന് ജില്ലാ കളക്ടർ നിർദ്ദേശിച്ചു.

നവംബർ വരെ എല്ലാ മൂന്നാമത്തെ വെളളിയാഴ്ചയും ഓഫീസുകളിൽ ശുചീകരണ പരിപാടി സംഘടിപ്പിക്കാനും ‘ഓണം ഹരിത ഓണം’ എന്ന ബ്രാൻഡിങ്ങോടെ ആഘോഷിക്കാനും തീരുമാനമായി. മാലിന്യമുക്തം നവകേളരം ക്യാമ്പയിന്റെ തുടർപ്രവർത്തനങ്ങളുടെ ഭാഗമായാണ് കളക്‌ട്രേറ്റ് തൂലിക കോൺഫറൻസ് ഹാളിൽ യോഗം ചേർന്നത്.

ഓഫീസുകളിലെ ഈ വേസ്റ്റും ഉപയോഗശൂന്യമായ ഫർണിച്ചറുകളും ക്ലീൻ കേരള കമ്പനിക്ക് നൽകണമെന്നും ഓഫീസുകളിലെ മാലിന്യങ്ങൾ ഹരിതകർമ്മ സേനയ്ക്കു യൂസർ ഫീ നൽകി കൈമാറുന്നുണ്ടെന്ന് ഉറപ്പാക്കണമെന്നും യോഗം നിർദ്ദേശിച്ചു.

മാലിന്യസംസ്‌കരണവുമായി ബന്ധപ്പെട്ടു പരിശോധന സ്‌ക്വാഡുകൾ ഓഫീസുകളും സ്‌കൂളുകളും പരിശോധിക്കുമെന്നും നിർദ്ദേശങ്ങൾ പാലിച്ചിട്ടില്ലെങ്കിൽ പിഴ ഈടാക്കുമെന്നും യോഗം ചൂണ്ടിക്കാട്ടി. ഓണത്തിന് ഓഫീസുകളിൽ ഭക്ഷണസാമഗ്രികൾ നൽകുമ്പോൾ ഡിസ്‌പോസിബിൾ വസ്തുക്കൾ പാടില്ല എന്നു കാറ്ററിങ് സർവീസുകാർക്കു കർശനമായ നിർദ്ദേശം നൽകണം.

മാലിന്യങ്ങൾ വേർതിരിക്കാൻ പോലുമാകാത്ത രീതിയിൽ കുഴഞ്ഞു പോകാനിടയാക്കുന്ന പേപ്പർ റോളുകൾ ഉപയോഗിക്കുന്നില്ല എന്നുറപ്പാക്കണം. മത്സരങ്ങൾ പ്രകൃതിക്കിണങ്ങിയവ ആകണമെന്നും യോഗം നിർദ്ദേശം നൽകി.