സ്വന്തം ലേഖകൻ
തൃശൂര്: സേഫ് ആന്റ് സ്ട്രോങ്ങ് നിക്ഷേപ തട്ടിപ്പിലെ മുഖ്യപ്രതി പ്രവീണ് റാണയുടെ കൂട്ടാളി അറസ്റ്റില്. വെളുത്തൂര് സ്വദേശി സതീശിനെയാണ് വിയ്യൂര് പൊലീസ് അറസ്റ്റ് ചെയ്തത്. തൃശൂര് പാലാഴിയിലെ വീട്ടില് ഒളിപ്പിച്ചിരുന്ന നിക്ഷേപ രേഖകളും പിടിച്ചെടുത്തു.
25 ലക്ഷം തട്ടിയെടുത്തെന്ന കോലഴി സ്വദേശിനിയുടെ പരാതിയില് റാണയുടെ വിശ്വസ്തനും അഡ്മിന് മാനേജരുമായ സതീശിനെ വിയ്യൂര് എസ്ഐ കെ സി ബിജുവും സംഘവുമാണ് പിടികൂടിയത്. റാണ ഒളിവില് പോയതിന് പിന്നാലെ സേഫ് ആന്റ് സ്ട്രോങ്ങിന്റെ ഓഫീസുകളില് നിന്ന് നിക്ഷേപ രേഖകളടക്കം കടത്തിയിരുന്നു. പാലാഴിയിലെ വീട്ടില് ഒളിപ്പിച്ച ഈ രേഖകളും പൊലീസ് കണ്ടെത്തി. റാണയുടെ ബിനാമിയായി പ്രവര്ത്തിച്ചയാളാണ് സതീശെന്നും പൊലീസ് പറയുന്നു.
Whatsapp Group 1 | Whatsapp Group 2 |Telegram Group
കഴിഞ്ഞ 27 ന് അരിമ്പൂര് റാണാ റിസോര്ട്ടില് വിളിച്ച നിക്ഷേപകരുടെ യോഗത്തില് ചെക്ക് നല്കാമെന്ന് റാണ വാഗ്ദാനം ചെയ്തിരുന്നു. പത്താം തീയതി അഡ്മിന് മാനേജരായ സതീശ് മുഖേന ചെക്ക് നല്കാമെന്നായിരുന്നു വാദ്ഗാനം.
എന്നാല് 29 ന് റാണ കമ്പനി ചെയര്മാന് സ്ഥാനത്ത് നിന്ന് രാജിവച്ചതറിഞ്ഞ നിക്ഷേപകര് കൂട്ടപ്പരാതിയുമായി എത്തുകയായിരുന്നു. പരാതി വന്നതിന് പിന്നാലെ സതീശും ഒളിവില് പോകുകയായിരുന്നു.പ്രവീണ് റാണ നാല് കൊല്ലം കൊണ്ട് നൂറു കോടിയിലധികം രൂപ തട്ടിയെടുത്തെന്നാണ് പൊലീസിന്റെ പ്രാഥമിക കണ്ടെത്തല്.
