ഡോക്ടറുടെ വീട്ടിൽ നിന്നും സ്വർണവും പണവും കവർന്നു: രണ്ടു മോഷ്ടാക്കൾ അറസ്റ്റിൽ; സംഭവം ഡോക്ടർ പരീക്ഷാഡ്യൂട്ടിക്ക് പോയ ദിവസം

സ്വന്തം ലേഖകൻ

കോഴിക്കാട്: കോഴിക്കോട് മലാപ്പറമ്പ് ഡോക്ടറുടെ വീട്ടിൽനിന്ന് സ്വർണവും പണവും കവർന്ന കേസിൽ രണ്ടുപേർ അറസ്റ്റിൽ. അമ്പലവയൽ സ്വദേശി വിജയൻ എന്ന കുട്ടി വിജയൻ (42 ) നടക്കാവ് പട്ടംവീട്ടിൽ ബവീഷ് (40) എന്നിവരെയാണ് മെഡിക്കൽ കോളജ് എ.സി.പി. കെ.സുദർശന്റെ നേതൃത്വത്തിലുള്ള പൊലീസ് സംഘവും സിറ്റി ഡാൻസാഫ് സ്‌ക്വാഡും ചേർന്ന് പിടികൂടിയത്.

ജൂലൈ 26-ന് രാത്രിയിലാണ് കോഴിക്കോട് മെഡിക്കൽ കോളേജിലെ ഇ.എൻ.ടി. വിഭാഗം അസിസ്റ്റന്റ് പ്രൊഫസറായ ഡോ. സ്വപ്ന നമ്പ്യാരുടെ വീട്ടിൽ കവർച്ച നടന്നത്. 44.5 പവന്റെ സ്വർണാഭരണങ്ങളും വജ്ര നെക്ലേസും പണവുമാണ് മോഷ്ടാക്കൾ കവർന്നത്.

സംഭവദിവസം ഡോക്ടർ പരീക്ഷാഡ്യൂട്ടിക്കായി കണ്ണൂരിലേക്ക് പോയതായിരുന്നു. നഗരത്തിലെ വിവിധ മോഷണക്കേസുകളിലെ പ്രതികളെ കേന്ദ്രീകരിച്ചാണ് കേസിൽ അന്വേഷണം ആരംഭിച്ചത്. ഇതിനിടെയാണ് മോഷ്ടാക്കളായ കുട്ടി വിജയനും ബവീഷും പൊലീസിന്റെ പിടിയിലാകുന്നത്.