റോഡിന് നടുവില്‍ മനോഹരമായ ചുവടുകള്‍ വച്ച്‌ മൈക്കിള്‍ ജാക്സണ്‍; സോഷ്യൽ മീഡിയയിൽ വൈറലായി ഒരു ട്രാഫിക് പൊലീസുകാരന്‍
സ്വന്തം ലേഖിക
കൊച്ചി :റോഡിന് നടുവില്‍ മനോഹരമായ ചുവടുകള്‍ വച്ച്‌ ഗതാഗതം നിയന്ത്രിക്കുന്ന പൊലീസുകാരനാണ് സോഷ്യല്‍ മീഡിയയില്‍ ഇപ്പോള്‍ താരം .റോഡിലൂടെ പോകുന്ന ഓരോ വാഹനങ്ങളെയും മനോഹരമായ ചുവടുകള്‍ക്കും കൈ ആംഗ്യങ്ങള്‍ക്കുമൊപ്പം കടത്തിവിടുന്ന ഇദ്ദേഹത്തെ അഭിനന്ദിച്ച്‌ നിരവധിപേരാണ് വീഡിയോ പങ്കുവെക്കുന്നത്.
സോഷ്യല്‍മീഡിയ വ്‌ളോഗറായ ജോബി ചുമന്നമണ്ണ് എന്നയാളാണ് ഈ ട്രാഫിക് ഹോം ഗാര്‍ഡിന്റെ മനോഹരമായ വീഡിയോ ആദ്യം സോഷ്യല്‍ മീഡിയയില്‍ പങ്കുവച്ചത്. “റോഡിന്‍റെ നടുക്ക് നിന്ന് ഈ പൊലീസുകാരന്‍ ചെയ്യുന്നത് കണ്ടോ” എന്ന അടികുറിപ്പോടെ പങ്കുവച്ച വീഡിയോ ലക്ഷകണക്കിന് ആളുകളാണ് കണ്ടിരിക്കുന്നത്. മൈക്കിള്‍ ജാക്സണ്‍ എന്നാണ് പലരും ഈ വൈറല്‍ താരത്തെ വിളിക്കുന്നത്.
Whatsapp Group 1 | Whatsapp Group 2 |Telegram Group
നോര്‍ത്ത് പറവൂരിലെ കെഎംകെ ജംഗ്ഷനില്‍ ട്രാഫിക് ഗാര്‍ഡായി ജോലി ചെയ്യുന്ന തോമസ് ആണ് വീഡിയോയിലെ താരം. തോമസിന്റെ ചടുലമായ ചുവടുകള്‍ക്കും കൈ ആംഗ്യങ്ങള്‍ക്കുമൊപ്പം വളരെ എളുപ്പത്തില്‍ വാഹനങ്ങള്‍ തലങ്ങും വിലങ്ങും കടന്നുപോവുന്നത് വീഡിയോയില്‍ കാണാം. അതിവേഗത്തില്‍ വാഹനങ്ങള്‍ വരുമ്ബോള്‍ രസകരമായ സ്റ്റെപ്പുകള്‍ വച്ച്‌ റോഡിന് തലങ്ങും വിലങ്ങും നടന്നാണ് തോമസ് വാഹനങ്ങളെ നിയന്ത്രിക്കുന്നത്. പൊലീസുകാരന്റ കൗതുകകരമായ ആക്ഷനുകള്‍ കണ്ട് ആശ്ചര്യത്തോടെ നോക്കുന്ന ചിലര്‍ യാത്രക്കാരുമുണ്ട്.
12 വര്‍ഷത്തോളമായി ഹോം ഗാര്‍ഡായി ജോലി ചെയ്യുന്ന തോമസ് മുഖത്ത് എപ്പോഴും ഒരു പുഞ്ചിരി സൂക്ഷിക്കുന്നുണ്ട്. റോഡിലൂടെ അതിവേഗത്തില്‍ വാഹനങ്ങള്‍ കടന്നു പോകുമ്ബോള്‍ തന്റെ ആംഗ്യങ്ങള്‍ വേഗത്തിലാകുന്നത് ആണെന്നും അല്ലാതെ ഡാന്‍സ് കളിക്കുന്നത് അല്ലെന്നുമാണ് തോമസ് പറയുന്നത്.
ബിഎസ്‌എഫില്‍ നിന്ന് വോളന്ററി റിട്ടയര്‍മെന്റ് എടുത്ത ശേഷമാണ് തോമസ് ഹോം ഗാര്‍ഡായി ജോലിയില്‍ പ്രവേശിച്ചത്. അതിന്റെ ട്രെയിനിങ്ങാണ് ഇന്ന് ജോലി നന്നായി ചെയ്യാന്‍ സഹായിക്കുന്നത് എന്ന് തോമസ് പറയുന്നു.തോമസിനെ കുറിച്ചു നാട്ടുകാര്‍ക്കും നൂറ് നാവാണ്. തിരക്ക് ഏറെയുള്ള ജങ്ഷനില്‍ തോമസ് സാര്‍ ഉള്ളപ്പോള്‍ ബ്ലോക്ക് ഉണ്ടാകാറേയില്ലെന്നാണ് നാട്ടുകാര്‍ പറയുന്നത്. ചെയ്യുന്ന ജോലി ഏതും ആയിക്കോട്ടെ അത് എങ്ങനെ മനോഹരമാക്കാം എന്ന ഒരു ഉദാഹരണം കൂടിയാണ് തോമസ്.
