4 വർഷത്തിനിടെ 68 വീടുകളില്‍ നിന്നായി 1500 പവൻ സ്വർണവും 1.76 കോടി രൂപയും കവർന്നു ; കുപ്രസിദ്ധ മോഷ്ടാവ് ‘റോഡ് മാൻ’ പിടിയിൽ

കുപ്രസിദ്ധ മോഷ്ടാവ് മൂർത്തി കോയമ്ബത്തൂരില്‍ പിടിയില്‍. തേനി സ്വദേശിയായ മൂർത്തിക്കൊപ്പം ഭാര്യയും ഹൈക്കോടതി അഭിഭാഷകയുമായ പ്രിയയും അറസ്റ്റിലായിട്ടുണ്ട്.

ഇവരില്‍ നിന്ന് 2 കാറും, 6 ബൈക്കും, 13 ലക്ഷത്തിന്റെ സൂപ്പർ ബൈക്കും കണ്ടെടുത്തതായി തമിഴ്നാട് പൊലീസ് അറിയിച്ചു.

4 വർഷത്തിനിടെ 68 വീടുകളില്‍ നിന്നായി 1500 പവൻ സ്വർണവും 1.76 കോടി രൂപയും ഇയാള്‍ മോഷ്ടിച്ചിട്ടുണ്ട്. റെയില്‍വേ ട്രാക്കിനോട് ചേർന്നുള്ള വീടുകളിലാണ് ഇയാള്‍ മോഷണം നടത്തിയിരുന്നത്. മോഷണത്തിന് ശേഷം ബസുകളില്‍ മാത്രം യാത്ര ചെയ്യുന്നതായിരുന്നു പതിവെന്നും പൊലീസ് പറയുന്നു.

‘മോഷ്ടിച്ച പണം ഉപയോഗിച്ച്‌ രാജപാളയത്ത് 4 കോടിയുടെ മില്ല് വാങ്ങിയതായും ഭാര്യ പ്രിയയാണ് പണം കൈകാര്യം ചെയ്തിരുന്നതെന്നും അന്വേഷണത്തില്‍ കണ്ടെത്തിയെന്നും പൊലീസ് അറിയിച്ചു.