റോഡിന് സമീപത്തെ മൈതാനത്ത് കളിച്ചുകൊണ്ടിരുന്ന കുട്ടികളുടെ പന്തു ഉരുണ്ടുവന്നു; വളവ് തിരിഞ്ഞെത്തിയ സ്‌കൂട്ടര്‍ പന്തില്‍ കയറി നിയന്ത്രണം തെറ്റി മറിഞ്ഞു; കോട്ടയം തലപ്പലത്ത് രണ്ടുപേർക്ക് പരിക്കേറ്റു
സ്വന്തം ലേഖകൻ
കോട്ടയം: റോഡിലേക്ക് ഉരുണ്ടിറങ്ങിയ ഫുട്ബോളില്‍ തട്ടി നിയന്ത്രണം നഷ്ടപ്പെട്ട ഇരുചക്രം വാഹനം മറിഞ്ഞുണ്ടായ അപകടത്തില്‍ രണ്ടുപേര്‍ക്ക് പരിക്കേറ്റു.
കോട്ടയം തലപ്പലത്താണ് അപകടം. തലപ്പലം സ്വദേശി വണ്ടാനത്ത് വീട്ടില്‍ നിത്യ, മാതൃസഹോദരിയുടെ മകന്‍ ഉള്ളനാട് സ്വദേശി ആദര്‍ശ് എന്നിവര്‍ക്കാണ് പരിക്കേറ്റത്.
Whatsapp Group 1 | Whatsapp Group 2 |Telegram Group
ഞായറാഴ്ചയാണ് അപകടം ഉണ്ടായത്. അപകടത്തിന്‍റെ വീഡിയോ സമൂഹമാധ്യമങ്ങളില്‍ വൈറലാണ്. റോഡിന് സമീപത്തെ മൈതാനത്ത് കളിച്ചുകൊണ്ടിരുന്ന കുട്ടികളുടെ പന്താണ് ഉരുണ്ട് റോഡിലേക്കെത്തിയത്.
വളവ് തിരിഞ്ഞെത്തിയ സ്‌കൂട്ടര്‍ പന്തില്‍ കയറി നിയന്ത്രണം തെറ്റി മറിയുകയായിരുന്നു. ഇതേത്തുടര്‍ന്ന് റോഡിലേക്ക് തെറിച്ചുവീണാണ് നിത്യയ്ക്കും ആദര്‍ശിനും പരിക്കേറ്റത്.
നാട്ടുകാര്‍ ഓടിയെത്തി. ഇരുവരെയും ആശുപത്രിയില്‍ എത്തിക്കുകയായിരുന്നു. റോഡില്‍ ഉരഞ്ഞ് കൈകളില്‍ സാരമായി പരിക്കേറ്റു. ഈരാറ്റുപേട്ടയിലെ സ്വകാര്യ ആശുപത്രിയില്‍ ചികിത്സ തേടിയ ശേഷം മടങ്ങി. വിവാഹിതയായി കോഴിക്കോട് താമസിക്കുന്ന നിത്യ ബന്ധു വീട്ടിലെത്തി മടങ്ങുമ്പോഴാണ് അപകടമുണ്ടായത്.
അതിനിടെ അപകടത്തിന്‍റെ വീഡിയോ കേരള പൊലീസ് ഫേസ്ബുക്ക് പേജിലൂടെ പങ്കുവെച്ചു. ‘കോട്ടയം ഈരാറ്റുപേട്ട നടന്ന അപകടമാണ് വീഡിയോയിലുള്ളത്. റോഡരികിലെ മൈതാനങ്ങളില്‍ കളിക്കുന്ന കൂട്ടുകാര്‍ ഇത്തരം അപകട സാധ്യത മുന്‍കൂട്ടി കണ്ട് വേണ്ട മുന്‍കരുതലുകള്‍ സ്വീകരിക്കേണ്ടതാണ്’- കേരള പൊലീസ് കുറിച്ചു.
