റിസർവ്​ ചെയ്​ത ബെർത്ത്​ അനുവദിച്ചില്ല ; റെയിൽവേക്ക്​ ഉപഭോക്​തൃ കമ്മീഷന്‍റെ പിഴ ; നഷ്ടപരിഹാരമായി 25,000 രൂപയും കോടതി ചെലവായി 5,000 രൂപയും നൽകാൻ വിധി

തിരുവനന്തപുരം: റിസർവ്​ ചെയ്​ത ബെർത്ത്​ അനുവദിക്കാത്ത റെയിൽവേക്ക്​ ഉപഭോക്​തൃ കമ്മീഷന്‍റെ പിഴ. മലപ്പുറം കോട്ടക്കൽ പുലിക്കോട്​ തൈക്കാട്​ ജംഷീദിന്‍റെ പരാതിയിൽ മലപ്പുറം ഉപഭോക്​തൃ കമീഷന്‍റേതാണ്​ വിധി. പ്രസിഡന്‍റ്​ കെ. മോഹൻദാസാണ്​ നഷ്ടപരിഹാരമായി 25,000 രൂപയും കോടതി ചെലവായി 5,000 രൂപയും​ വിധിച്ചത്​. പാലക്കാട്​ റെയിൽവേ ഡിവിഷൻ മാനേജർ, ഐ.ആർ.സി.ടി.സി, ബംഗളൂരു ഡിവിഷനൽ റെയിൽവേ ഓഫിസ്​ എന്നിവരെ എതിർകക്ഷികളാക്കിയായിരുന്നു​ ഹരജി.

2024 ഏപ്രിൽ 25ന്​ യശ്വന്ത്​പുർ എക്സ്​പ്രസിലാണ്​ (16527) പരാതിക്കാരൻ തൽക്കാലിൽ സ്ലീപ്പർ ടിക്കറ്റ്​ ബുക്ക്​ ചെയ്തത്​. എന്നാൽ തനിക്ക്​ അനുവദിച്ച എസ്​ വൺ കോച്ചിലെ 79 നമ്പർ ബെർത്തിൽ റിസർവ്​ ചെയ്യാത്ത അഞ്ച്​ പേർ യാത്ര ചെയ്യുന്നുണ്ടായിരുന്നു. അവർ പരാതിക്കാരന്​ ബെർത്ത്​ ഒഴിഞ്ഞ്​ കൊടുത്തില്ല. തൊട്ടടുത്ത ദിവസം തിരൂർ റെയിൽവേ സ്​റ്റേഷൻ മാസ്റ്റർക്ക്​ രേഖാമൂലം നൽകിയ പരാതി സ്വീകരിക്കാൻ തയാറായില്ല.

ഐ.ആർ.സി.ടി.സിക്ക്​ ഇ-മെയിലായി നൽകിയ പരാതിയിലും മറുപടി ലഭിച്ചില്ല. തുടർന്ന്​ വിവരാവകാശ നിയമപ്രകാരം വിവരങ്ങൾ ശേഖരിച്ചാണ്​ പരാതിയുമായി ഉപ​ഭോക്​തൃ കമീഷനെ സമീപിച്ചത്​.