പതിനേഴുകാരിയുടെ നഗ്നചിത്രം സോഷ്യൽ മീഡിയയിൽ പ്രചരിപ്പിച്ചു; മലപ്പുറം സ്വദേശിയായ യുവാവിനെ പൊലീസ് അറസ്റ്റ് ചെയ്തു

തേർഡ് ഐ ബ്യൂറോ

കാസർകോട്: പതിനേഴുകാരിയായ യുവതിയെ പ്രണയം നടിച്ച് പീഡിപ്പിച്ച് അശ്ലീല ചിത്രം കൈവശപ്പെടുത്തിയ ശേഷം ഈ ചിത്രം സോഷ്യൽ മീഡിയയിൽ പ്രചരിപ്പിച്ച യുവാവ് പിടിയിലായി. മലപ്പുറം സ്വദേശിയെയാണ് പൊലീസ് അറസ്റ്റ് ചെയ്തത്.

മലപ്പുറം വാഴക്കാട് ചെറുവായൂർ മട്ടുപുറത്തു വീട്ടിൽ എം. അനുകൃഷ്ണൻ എന്ന കിച്ചു (23) വിനെയാണ് ബേഡകം പൊലീസ് പോക്സോ കേസിൽ അറസ്്റ്റ് ചെയ്തത്. ബേഡകം പൊലീസ് ഇൻസ്പെക്ടർ ടി. ഉത്തംദാസ്, പൊലീസുകാരായ പ്രദീപ് കുമാർ, ഹരീഷ് കടവത്ത് എന്നിവർ മലപ്പുറം വാഴക്കാട്ടുനിന്ന് അറസ്റ്റ് ചെയ്തത്.

ബേഡകം പൊലീസ് സ്റ്റേഷൻ പരിധിയിലെ 17-കാരിയുടെ പരാതിയിലാണ് അറസ്റ്റ്. പെൺകുട്ടിയെ സാമൂഹികമാധ്യമംവഴി പരിചയപ്പെട്ടാണ് ഇയാൾ പ്രണയം നടിച്ച് അർധനഗ്നചിത്രം കൈക്കലാക്കിയത്. മാർച്ച് 26-നാണ് ചിത്രം പ്രചരിപ്പിച്ചത്. തുടർന്നും പ്രചരിപ്പിക്കുന്നതിനായി ഇയാൾ ചിത്രം ഫോണിൽ സൂക്ഷിച്ചിരുന്നു.

പൊലീസ് സൈബർ സെല്ലിന്റെ സഹായത്തോടെ അന്വേഷണം നടത്തിയാണ് ഇയാളെ കുടുക്കിയത്. കാസർകോട് കോടതി നവംബർ 10 വരെ റിമാൻഡ് ചെയ്ത പ്രതിയെ കാഞ്ഞങ്ങാട് സബ് ജയിലിലാക്കി.