സ്വന്തം ലേഖിക
തിരുവനന്തപുരം: മഴക്കാലം പ്രധാനമായി പേടിക്കേണ്ടത് രോഗങ്ങളെയാണ്.
എന്നാല്‍ അതൊടൊപ്പം പേടിക്കേണ്ട മറ്റൊന്ന് കൂടിയാണ് പാമ്പുകള്‍. മഴ കൂടുതല്‍ ശക്തിപ്പെട്ട് കഴിഞ്ഞാല്‍ മാളങ്ങള്‍ ഇല്ലാതാവുകയും പിന്നീട് പാമ്പുകള്‍ പുറത്തേക്കിറങ്ങുന്നതും പതിവ് കാഴ്ചയാണ്.
Whatsapp Group 1 | Whatsapp Group 2 |Telegram Group
മാളങ്ങള്‍ ഇല്ലാതാകുന്നതോടെ പാമ്പുകള്‍ സമീപത്തെ വീടുകളിലേക്ക് ചേക്കേറുകയാണ് ചെയ്യാറുള്ളത്. മഴക്കാലത്ത് വീടിനുള്ളില്‍ പാമ്പ് കയറാതിരിക്കാൻ ചില കാര്യങ്ങള്‍ ശ്രദ്ധിക്കേണ്ടതുണ്ട്…
ഒന്ന്…
പാമ്പുകള്‍ക്ക് അനുകൂലമായ സാഹചര്യം വീട്ടിലും പറമ്പിലും ഒഴിവാക്കുക എന്നതാണ് ചെയ്യേണ്ട പ്രധാനപ്പെട്ട കാര്യം. പൊത്തുകള്‍, മാളങ്ങള്‍ എന്നിവ വീട്ടുപരിസരത്തു ഉണ്ടായാല്‍ അവ അടയ്ക്കാൻ പ്രത്യേകം ശ്രദ്ധിക്കണം. കരിയില കൂടിക്കിടക്കുന്നതും തടിക്കഷ്ണം, ഓല, ഓട്, കല്ല് എന്നിവ അടുക്കിവച്ചിരിക്കുന്ന സ്ഥലങ്ങളും പാമ്പിന്റെ പതിവ് വാസകേന്ദ്രങ്ങളാണ്. ഇവിടങ്ങളില്‍ പാമ്പിനെ പെട്ടെന്ന് കണ്ടെത്താൻ കഴിയില്ലെന്നത് അപകടസാധ്യത കൂട്ടുന്നു.
രണ്ട്…
അടുക്കള, ജലസംഭരണി എന്നിങ്ങനെ തണുപ്പ് കൂടുതലുള്ള ഇടങ്ങളില്‍ പ്രത്യേക ശ്രദ്ധ നല്‍കണം. വീടിനുള്ളിലേക്കുള്ള ഓവുചാലുകള്‍ ഇടയ്ക്കിടെ വൃത്തിയാക്കുകയും പരിശോധിക്കുകയും വേണം. ഇവ കൃത്യമായി അടച്ചുവയ്ക്കാനും ശ്രദ്ധിക്കുക.
മൂന്ന്…
മഴക്കാലത്ത് വണ്ടിക്കുള്ളിലും ഷൂസുകള്‍ക്കുള്ളിലുമെല്ലാം തണുപ്പ് തേടി പാമ്പുകള്‍ പതുങ്ങിയിരിക്കാറുണ്ട്. അത് കൊണ്ട് തന്നെ ഷൂസ് ഉപയോഗിക്കുന്നവര്‍ നല്ല പോലെ പരിശോധിച്ച ശേഷം മാത്രം ഇടുക.
നാല്…
വീട്ടില്‍ കോഴിക്കൂടോ വളര്‍ത്തുമൃഗങ്ങളോ ഉണ്ടെങ്കില്‍ അധിക ശ്രദ്ധ വേണം. കോഴിക്കൂട്ടില്‍ പാമ്പ് വരുന്നതൊരു സ്ഥിരം സംഭവമാണ്. വളര്‍ത്തുമൃഗങ്ങള്‍ക്ക് ഭക്ഷണം നല്‍കുന്ന പാത്രത്തില്‍ മിച്ചമുള്ളത് കഴിക്കാൻ എലികള്‍ വരുമ്ബോള്‍ ഇവയെ ലക്ഷ്യംവച്ചും പാമ്പ് എത്തിയേക്കാം.
അഞ്ച്…
വീട്ടില്‍ ഇടുന്ന ചവിട്ടിയും ശ്രദ്ധിക്കാതെ പോകരുത്. ഇതിനടിയില്‍ പാമ്പ് ചുരുണ്ടുകിടക്കുന്ന സംഭവങ്ങള്‍ നിങ്ങള്‍ കേട്ടിട്ടുണ്ടാകാം. അതുകൊണ്ട് എന്നും ശ്രദ്ധയോടെ ചവിട്ടി കുടഞ്ഞിടണം.
