പഴയ തുരുമ്പെടുത്ത റെയിൽവേ കോച്ചുകൾ ഇനിയില്ല ; പകരം റെസ്‌റ്റോറന്റുകൾ : പുത്തൻ പരീക്ഷണവുമായി ഇസ്‌റ്റേൺ റെയിൽവേ

സ്വന്തം ലേഖകൻ

ഡൽഹി: പഴയ റെയിൽവേ കോച്ചുകൾ ഇനി തുരുമ്പെടുത്ത് നശിച്ചു പോകില്ല. പകരം അവ റെയിൽവേ റെസ്റ്റോറന്റുകളാക്കി മാറ്റുകയാണ്. ഈസ്റ്റേൺ റെയിൽവെയാണ് ഈ പുതിയ പരീക്ഷണം നടത്തുന്നത്. അസൻസോൾ റെയിൽവെ സ്റ്റേഷനിൽ കോച്ച് റെസ്റ്റോറന്റ് തയ്യാറായിക്കഴിഞ്ഞു. റെയിൽവെ യാത്രക്കാർക്കും പൊതുജനങ്ങൾക്കും ഈ റസ്റ്റോറന്റ് ഉപയോഗിക്കാം.

ഈസ്റ്റേൺ റെയിൽവെയുടെ പഴക്കംചെന്ന മെമു കോച്ചുകളാണ് ഭക്ഷണശാലകളായി മാറ്റിയത്. അടുത്ത അഞ്ചുവർഷത്തിനുള്ളിൽ ഈയിനത്തിൽ 50 ലക്ഷം രൂപ സമാഹരിക്കുക ലക്ഷ്യമിട്ടാണ് പുതിയ സംരംഭം. ഒരു കോച്ചിൽ ചായയും ലഘുഭക്ഷണവുമാണ് ലഭിക്കുക.

42 സീറ്റുകളുള്ള മറ്റൊരു കോച്ചിൽ പ്രഭാത ഭക്ഷണം, ഉച്ചഭക്ഷണം, രാത്രി ഭക്ഷണം എന്നിവയെല്ലാം ലഭിക്കും. കോച്ചിന്റെ ഉൾവശം ചായംപൂശി അലങ്കരിച്ചാണ് റസ്റ്റോറന്റാക്കിമാറ്റിയിരിക്കുന്നത്. ഛായാചിത്രങ്ങളും ടൈപ്പ് റൈറ്റർ പോലുള്ള പഴയ ഉപകരണങ്ങളും കോച്ചിന്റെ ഭംഗി കൂട്ടിയിട്ടുണ്ട്.