പ്രധാനമന്ത്രിക്ക് എന്തുചെയ്യണമെന്ന് പറഞ്ഞുകൊടുക്കുന്നത് ദൈവമാണ്,മോദിയുടെ പരമാത്മാവ് സഹായിക്കുന്നത് അദാനിയേയും അംബാനിയേയും, ഞാൻ അങ്ങനെയല്ല, സാധാരണ മനുഷ്യനാണ്; മോദിയെ പരിഹസിച്ച് രാഹുൽ ഗാന്ധി

മലപ്പുറം: പരമാത്മാവ് നരേ​ന്ദ്രമോദിയോട് സംസാരിക്കുന്നത് പോലെ തന്നോട് സംസാരിക്കാറില്ലെന്ന് രാഹുൽ ഗാന്ധി. താനൊരു സാധാരണ മനുഷ്യനാണെന്നും ജനങ്ങളാണ് തന്റെ ദൈവമെന്നും രാഹുൽ പറഞ്ഞു.

അധികാരമുണ്ടായാൽ എന്തും നടത്താമെന്ന ധാരണയാണ് മോദിക്കെന്നും ഭരണഘടന കൈയിലേന്തി രാഹുൽ ​ഗാന്ധി പറഞ്ഞു. പ്രധാനമന്ത്രിക്ക് എന്തുചെയ്യണമെന്ന് പറഞ്ഞുകൊടുക്കുന്നത് ദൈവമാണ്.

താൻ ജൈവികമായി ഉണ്ടായ ആളല്ലെന്നാണ് ഒരിക്കൽ പ്രധാനമന്ത്രി പ്രസംഗിച്ചത്. ഒരു തീരുമാനവും താൻ എടുക്കാറില്ലെന്നും തന്നെ ഭൂമിയിലേക്ക് അയച്ച പരമാത്മാവ് തീരുമാനിക്കുമെന്നുമാണ് മോദി പറഞ്ഞത്.

എന്നാൽ, അദാനിയുടേയും അംബാനിയുടേയും തീരുമാനങ്ങളാണ് ഈ വിചി​ത്രമായ പരമാത്മാവ് ഏറ്റെടുത്തിരിക്കുന്നതെന്ന് രാഹുൽ പരിഹസിച്ചുകൊണ്ട് പറഞ്ഞു. പരമാത്മാവ് പറഞ്ഞതനുസരിച്ച് ആദ്യം വിമാനത്താവളങ്ങളും പിന്നീട് വൈദ്യുതി നിലയങ്ങളും അദാനിക്കും അംബാനിക്കും ​കൊടുത്തെന്നും രാഹുൽ പരിഹസിച്ചു.

എന്നാൽ, എനിക്ക് അങ്ങനെയല്ല. ഞാനൊരു സാധാരണ മനുഷ്യനാണെന്നും രാഹുൽ​ഗാന്ധി പറഞ്ഞു. വയനാട്ടിൽ എത്തി വോട്ടർമാരോടുള്ള നന്ദി പ്രസം​ഗത്തിലാണ് രാഹുൽ ​ഗാന്ധി ഇക്കാര്യം വ്യക്തമാക്കിയത്.