ഡല്‍ഹി: 26 നിരപരാധികളുടെ ജീവനെടുത്ത പഹല്‍ഗാം ഭീകരാക്രമണത്തിന് കാത്തിരുന്ന് കൃത്യമായി മറുപടി നല്‍കിയിരിക്കുകയാണ് ഇന്ത്യ
.ഓപ്പറേഷൻ സിന്ദൂർ എന്ന് പേരിട്ട സംയുക്ത സൈനിക ആക്രമണത്തിലൂടെ ഇന്ത്യ, ഒമ്പത് പാക് ഭീകരകേന്ദ്രങ്ങളാണ് തകർത്ത് തരിപ്പണമാക്കിയത്.
ഇതിനായി കൃത്യം ലക്ഷ്യം ഭേദിക്കുന്ന യുദ്ധോപകരണങ്ങളാണ് ഇന്ത്യ ഉപയോഗിച്ചതെന്നാണ് റിപ്പോർട്ടുകള്‍. ലക്ഷ്യസ്ഥാനം തിരിച്ചറിയാൻ ഇന്റലിജൻസ് ഏജൻസികളാണ് ഇന്ത്യയ്ക്ക് വിവരങ്ങള്‍ കൈമാറിയത്. സർജിക്കല്‍ സ്‌ട്രൈക്കിനായി സ്‌കാല്‍പ് മിസൈലുകള്‍,ഹാമ്മർ ബോംബുകള്‍ തുടങ്ങിയവയോടൊപ്പം പ്രിസിഷൻ സ്‌ട്രൈക്ക് ആയുധ സംവിധാനങ്ങളും ലോയിറ്ററിംഗ് മ്യൂണിഷൻസ് സിസ്റ്റംസും (എല്‍എംഎസ്) ഉപയോഗിച്ചെന്നാണ് വിവരം.
പുതിയ തരം ആയുധ സംവിധാനമായ എല്‍എംഎസിനെ ചാവേർ ഡ്രോണുകള്‍ എന്നും സൂയിസൈഡ് ഡ്രോണുകള്‍ എന്നും അറിയപ്പെടുന്നുണ്ട്. ഈ സംവിധാനത്തില്‍ പോർമുന ഘടിപ്പിച്ച ഒരു ആളില്ലാ വിമാനമുണ്ടാകും. ലക്ഷ്യം കണ്ടെത്തുന്നതു വരെ എല്‍എംഎസ് ലക്ഷ്യസ്ഥാനത്തിന് മുകളില്‍ കറങ്ങി നടക്കും.
Whatsapp Group 1 | Whatsapp Group 2 |Telegram Group
ലക്ഷ്യം കണ്ടെത്തിക്കഴിഞ്ഞാല്‍ അതിലേക്ക് ഇടിച്ചിറങ്ങുകയും ചെയ്യും. ലക്ഷ്യസ്ഥാനത്തിന്റെയും അതിന്റെ ചുറ്റുപാടുകളുടെയും തത്സമയ ചിത്രം കാണുന്ന ഒരു ഓപ്പറേറ്റിംഗ് സംവിധാനമാണ് എല്‍എംഎസ് നിയന്ത്രിക്കുന്നത്. ആക്രമണത്തിന്റെ സമയം, കൃത്യമായ ദിശ എന്നിവ നിയന്ത്രിക്കാനും ഈ സംവിധാനത്തിന് കഴിയും.
ആക്രമിക്കേണ്ട സ്ഥലം ഉടനടി കണ്ടെത്താൻ സാധിച്ചില്ലെങ്കിലും ദീർഘനേരം ആകാശത്ത് കറങ്ങിനടന്ന് ലക്ഷ്യസ്ഥാനത്തിനായി കാത്തിരിക്കാൻ എല്‍എംഎസിന് കഴിയും. അത്യാധുനിക സെൻസറുകളും ഗൈഡൻസ് സിസ്റ്റങ്ങളും ഉപയോഗിക്കുന്നതിനാല്‍, ലക്ഷ്യസ്ഥാനത്ത് വളരെ കൃത്യതയോടെ ആക്രമണം നടത്താൻ സാധിക്കുന്നു. ആക്രമണത്തിനിടയില്‍ പോലും ലക്ഷ്യം മാറ്റാനോ, ദൗത്യം ഉപേക്ഷിക്കാനോ എല്‍എംഎസിന് സാധിക്കും. യുവിഷൻ ഹീറോ സീരീസ്,
എയറോവിറോണ്‍മെന്റ് സ്വിച്ച്‌ബ്ലേഡ് സീരീസ് എന്നിവ എല്‍എംഎസിന് ഉദാഹരണങ്ങളാണ്. എയർഫ്രെയിം, പേലോഡ്, ഗൈഡൻസ് സിസ്റ്റം, പ്രൊപ്പല്‍ഷൻ സിസ്റ്റം, ആശയവിനിമയ സംവിധാനം, എഫ്പിവി ഡ്രോണുകള്‍ തുടങ്ങിയവ എല്‍എംഎസില്‍ ഉപയോഗിച്ചിട്ടുണ്ട്.
1. എയർഫ്രെയിം: കാർബണ്‍ ഫൈബർ അല്ലെങ്കില്‍ സംയുക്ത പ്ലാസ്റ്റിക്കുകള്‍ പോലെയുള്ള ഭാരം കുറഞ്ഞ വസ്തുക്കള്‍ ഉപയോഗിച്ചുകൊണ്ടാണ് ഡ്രോണിന്റെ ഘടനാപരമായ ചട്ടക്കൂട് നിർമിച്ചിരിക്കുന്നത്.
2. പേലോഡ്: ഡ്രോണ്‍ വഹിക്കുന്ന വാർഹെഡ്. ചെറുതും ഉയർന്ന സ്‌ഫോടനാത്മകവുമായത് മുതല്‍ ആന്റിടാങ്ക് യുദ്ധോപകരണങ്ങള്‍ പോലുള്ളവ പോലും ഉപയോഗിക്കാറുണ്ട്.
3. ഗൈഡൻസ് സിസ്റ്റം: ഡ്രോണിന്റെ ദിശ നിയന്ത്രിക്കാനും ലക്ഷ്യം കണ്ടെത്താനും പ്രാപ്തമാക്കുന്ന സംവിധാനം. ഇതില്‍ ഇനേർഷ്യല്‍ നാവിഗേഷൻ സിസ്റ്റങ്ങള്‍, ഇൻഫ്രാറെഡ് അല്ലെങ്കില്‍ ഇലക്‌ട്രോ ഒപ്റ്റിക്കല്‍ ക്യാമറകള്‍ തുടങ്ങിയ സെൻസറുകള്‍ എന്നിവ ഉള്‍പ്പെടുത്തിയിട്ടുണ്ട്.
4. ആശയവിനിമയ സംവിധാനം: ഡ്രോണിനെ അതിന്റെ ഓപ്പറേറ്ററുമായി ആശയവിനിമയം നടത്താൻ അനുവദിക്കുന്ന സംവിധാനമുണ്ട്. ഇതില്‍ സാധാരണയായി റേഡിയോ അല്ലെങ്കില്‍ സാറ്റ്ലൈറ്റ് ആശയവിനിമയങ്ങളാണ് ഉപയോഗിക്കുന്നത്.
5.എഫ്പിവി ഡ്രോണുകള്‍: ഓപ്പറേറ്റർക്ക് ഡ്രോണിന്റെ സഞ്ചാരവഴിയും മുന്നിലുള്ള കാഴ്ചകളും ഈ സംവിധാനത്തിലൂടെ കാണാൻ സാധിക്കും. റേസിംഗ്, ഫ്രീസ്റ്റൈല്‍ ഫ്ലയിംഗ്, ഏരിയല്‍ ഫോട്ടോഗ്രഫി, വീഡിയോഗ്രാഫി എന്നിവയുള്‍പ്പെടെ വിവിധ ആവശ്യങ്ങള്‍ക്കായി എഫ്പിവി ഡ്രോണുകള്‍ ഉപയോഗിക്കാം.
