പുനലൂര്‍ കോടതിമുറിയില്‍ പരിഭ്രാന്തി സൃഷ്ടിച്ച് യുവാവ് ; തലയിലെ മുറിവിൽ നിന്നും ചോര ഒലിപ്പിച്ച് സാക്ഷികൂട്ടിലേക്ക് ഓടി കയറി ബഹളം വെച്ചു,പോലീസെത്തി ഇയാളെ ആശുപത്രിയിലേക്ക് മാറ്റി

കൊല്ലം : പുനലൂർ ജുഡീഷ്യൽ ഫസ്റ്റ് ക്ലാസ് കോടതി നാടകീയമായ സംഭവങ്ങൾക്കാണ് വ്യാഴാഴ്ച രാവിലെ സാഷ്യം വഹിച്ചത്.

ഫസ്റ്റ് ക്ലാസ് കോടതി രണ്ടിൽ രാവിലെ 10.30 -ഓടെ ചോരയൊലിക്കുന്ന മുറിപ്പാടുമായി ഒരു യുവാവ് സാക്ഷിക്കൂട്ടിലേക്ക് ഓടിക്കയറിയത് പരിഭ്രാന്തി പരത്തി. തിരുനെൽവേലി സ്വദേശി ദാവീദ് രാജ (43) ആണ് കോടതിമുറിയിൽ പരിഭ്രാന്തി സൃഷ്ടിച്ചത്.

തലയിലെ മുറിപ്പാടിൽനിന്ന് ചോരയൊലിക്കുന്ന നിലയിലാണ് യുവാവ് കോടതിമുറിയിലേക്ക് ഓടിക്കയറിയത്. ഈ സമയം കോടതി ആരംഭിച്ചിരുന്നില്ല. സാക്ഷിക്കൂട്ടിൽ കയറിയിരുന്ന യുവാവ് വൈകാതെ ബഹളമുണ്ടാക്കാൻ തുടങ്ങി. തുടർന്നാണ് പോലീസെത്തി ഇയാളെ ആശുപത്രിയിലേക്ക് മാറ്റിയത്.

പോലീസെത്തി യുവാവിനെ കസ്റ്റഡിയിലെടുത്ത് പുനലൂർ താലൂക്ക് ആശുപത്രിയിൽ പ്രവേശിപ്പിച്ചു. ഇയാൾക്ക് മാനസികാസ്വാസ്ഥ്യമുണ്ടെന്ന് സംശയിക്കുന്നതായി പോലീസ് പറഞ്ഞു. യുവാവിന് പരിക്കേറ്റത് എങ്ങനെയെന്ന് വ്യക്തമല്ലെന്നും കൂടുതൽ വിവരങ്ങൾ അന്വേഷിച്ച് വരികയാണെന്നും പോലീസ് അറിയിച്ചു.