ഇനി പോസ്റ്റുമാനെ കാത്തിരിക്കേണ്ട ; പിഎസ്സി ഓഫിസിലെത്തി നേരിട്ട് ജോലിക്കത്ത് കൈപ്പറ്റാം

സ്വന്തം ലേഖകൻ

കൊച്ചി: പിഎസ്സി അഡൈ്വസ് മെമ്മോ ഓഫീസിൽ വെച്ച് ഉദ്യോഗാർത്ഥികൾക്ക് നേരിട്ട് കൈമാറാൻ തീരുമാനം. സാധാരണ തപാലിൽ അയക്കുന്ന നിയമന ശുപാർശ മെമ്മോ (അഡൈ്വസ് മെമ്മോ) പലപ്പോഴും ഉദ്യോഗാർത്ഥികൾക്ക് ലഭിക്കുന്നില്ലെന്ന പരാതി ഉയർന്ന സാഹചര്യത്തിലാണ് പുതിയ തീരുമാനം.അഡൈ്വസ് മെമ്മോയുടെ ഡ്യൂപ്ലിക്കേറ്റ് നൽകുന്നതിന് നിലവിൽ വ്യവസ്ഥയില്ല. അത് കൊണ്ട് തന്നെ മെമ്മോ കിട്ടിയില്ലെങ്കിൽ പകരം നിയമനം ശുപാർശ ചെയ്തുവെന്ന അറിയിപ്പ് നൽകാൻ മാത്രമേ കഴിയുകയുള്ളൂ. കമ്മീഷന്റെ ഓഫീസിൽ നേരിട്ട് ഹാജരായി നിയമന ശുപാർശ ഉദ്യോഗാർത്ഥി കൈപ്പറ്റുന്നതോടെ ഈ പ്രശ്നത്തിന് പരിഹാരമാകും. ജൂലൈ 25 മുതൽ അംഗീകരിക്കുന്ന നിയമന ശുപാർശകൾക്കാണ് പുതിയ നടപടിക്രമം ബാധകമാകുക. ആഗസ്റ്റ് അഞ്ചിന് കമ്മീഷന്റെ ആസ്ഥാന ഓഫീസിൽ വെച്ച് ഈ നടപടിക്രമമനുസരിച്ച് അഡൈ്വസ് മെമ്മോ വിതരണം ആരംഭിക്കും. മറ്റ് മേഖല/ജില്ലാ ഓഫീസുകളിൽ തുടർന്നുള്ള ദിവസങ്ങളിലായി വിതരണം ചെയ്യും.അഡൈ്വസ് മെമ്മോ വിതരണം ചെയ്യുന്ന തീയതി അടക്കമുളള വിവരം ബന്ധപ്പെട്ട ഉദ്യോഗാർത്ഥികൾക്ക് തപാൽ, പ്രൊഫൈൽ, മൊബൈൽ സേന്ദേശങ്ങളിലൂടെ നൽകും. നിശ്ചിത ദിവസം കൈപ്പറ്റാത്ത ഉദ്യോഗാർത്ഥികൾക്ക് തുടർന്നുള്ള ദിവസങ്ങളിലും അതാത് പിഎസ്സി ഓഫീസിൽ നിന്നും കൈപ്പറ്റാം. ജോലിയിൽ പ്രവേശിക്കുമ്പോഴും തുടർന്ന് നിയമനപരിശോധന വേളയിലും അഡൈ്വസ് മെമ്മോ അത്യന്താപേക്ഷിത രേഖയാണ്.നിയമന ശുപാർശ മെമ്മോ ബന്ധപ്പെട്ട ഉദ്യോഗാർത്ഥി തന്നെയാണ് കൈപ്പറ്റുന്നത് എന്ന് ഇതുമൂലം കമ്മീഷന് ഉറപ്പാക്കാൻ കഴിയും.ഉദ്യോഗാർത്ഥികൾ കൈപ്പാറ്റാത്ത അഡൈ്വസ് മെമ്മോകളിൽ നിന്നും നിയമനത്തിനായി ഹാജരാകാത്ത ഉദ്യോഗാർത്ഥികളുടെ വിവരം കമ്മീഷന് മനസ്സിലാക്കാനും എൻജെഡി ഒഴിവുകളിലേക്കുള്ള നിയമന ശുപാർശാ നടപടികൾ ത്വരിതപ്പെടുത്തുവാനും ഈ നടപടി സഹായകരമാകും.