സ്വന്തം ലേഖിക
പാലക്കാട്: രാജ്യത്ത് കല്ക്കരി ക്ഷാമം രൂക്ഷമായ സാഹചര്യത്തിൽ സംസ്ഥാനത്ത് പവര്കട്ട് ഏര്പ്പെടുത്തേണ്ടി വരുമെന്ന് വൈദ്യുതി വകുപ്പ് മന്ത്രി കെ കൃഷ്ണന്കുട്ടി.
കല്ക്കരി ക്ഷാമം ഉടന് പരിഹരിക്കാന് കഴിയുമെന്ന് പ്രതീക്ഷിക്കുന്നില്ലെന്നും മന്ത്രി പറഞ്ഞു. കേന്ദ്രത്തില് നിന്ന് ആയിരം മെഗാവാട്ടാണ് കിട്ടേണ്ടിയിരുന്നത് എന്നാല് അതില് കുറവുണ്ടായി.
Whatsapp Group 1 | Whatsapp Group 2 |Telegram Group
വൈദ്യുതി പ്രതിസന്ധി സംബന്ധിച്ച് കെഎസ്ഇബി നിരീക്ഷിച്ച് വരികയാണെന്നും ജനങ്ങള് നിയന്ത്രിക്കണമെന്ന് കെഎസ്ഇബി ആവശ്യപ്പെട്ടിട്ടുണ്ടെന്ന് മന്ത്രി പറഞ്ഞു. വൈദ്യതി നിയന്ത്രിക്കാന് സാധിച്ചില്ലെങ്കിൽ പവര് കട്ട് അല്ലാതെ മറ്റൊരു വഴിയില്ലെന്നാണ് മന്ത്രി പറയുന്നത്.
ജല വൈദ്യുത പദ്ധതികള് മാത്രമാണ് പരിഹാരം. കഴിഞ്ഞ ദിവസം യൂണിറ്റിന് 18 രൂപ കൊടുത്താണ് വൈദ്യുതി വാങ്ങിയത്. ഇത് വലിയ സാമ്പത്തിക പ്രതിസന്ധി വൈദ്യുതി ബോര്ഡിന് സൃഷ്ടിക്കുന്നുണ്ട്. മഴക്കാലമായതിനാല് കേരളത്തില് വലിയ തോതില് വൈദ്യുതി ഉപയോഗം കുറയാറുണ്ട്. അതിനാല് അടുത്ത വേനല്ക്കാലമാകുമ്പോഴേക്കും പ്രതിസന്ധി തുടര്ന്നാല് വൈദ്യുതിക്ക് വലിയ ക്ഷാമം നേരിടേണ്ടി വരുമെന്നാണ് വിവരം.
അതേസമയം, പഞ്ചാബിലും രാജസ്ഥാനിലും ഉത്തര്പ്രദേശിലും ഇതിനോടകം പവര് കട്ട് പ്രഖ്യാപിച്ചിട്ടുണ്ട്. ഡല്ഹി, ഗുജറാത്ത്, പഞ്ചാബ്, രാജസ്ഥാന്, ഡല്ഹി, തമിഴ്നാട് എന്നീ സംസ്ഥാനങ്ങള് ബ്ലാക്ക് ഔട്ട് മുന്നറിയിപ്പ് നല്കിയിരിക്കുകയാണ്. ഉത്തരേന്ത്യന് സംസ്ഥാനങ്ങളിലുണ്ടായ കനത്ത മഴയും വെള്ളപ്പൊക്കവും മൂലം കല്ക്കരി ഖനനവും ചരക്ക് നീക്കവും തടസ്സപ്പെട്ടതാണ് പ്രതിസന്ധിക്ക് കാരണമെന്നാണ് കേന്ദ്ര ഊര്ജ്ജ മന്ത്രാലയം വ്യക്തമാക്കുന്നത്.
