ഉന്നത പൊലീസ് ഉദ്യോഗസ്ഥരെ അപകീർത്തിപ്പെടുത്താൻ വ്യാജ പ്രചാരണം: വാർത്ത നൽകാൻ എ എസ് ഐ തേർഡ് ഐ ന്യൂസിനെ സമീപിച്ചു; നിങ്ങളുടെ വൈരാഗ്യം തീർക്കാനുള്ള സ്ഥലമല്ല ഇതെന്നും, വാർത്ത നൽകാനാവില്ലെന്നും പറഞ്ഞതിന് ചീഫ് എഡിറ്ററെ അസഭ്യം പറഞ്ഞ എ എസ് ഐ യെ സസ്‌പെന്റ് ചെയ്തു

സ്വന്തം ലേഖകൻ

കോട്ടയം: തേർഡ് ഐ ന്യൂസ് ചീഫ് എഡിറ്റർ ഏ.കെ ശ്രീകുമാറിനെ അസഭ്യം പറഞ്ഞ സംഭവത്തിൽ കോട്ടയം ട്രാഫിക്ക് സ്റ്റേഷനിലെ എ.എസ്. ഐ. രാധാകൃഷ്ണനെ സസ്‌പെൻറ് ചെയ്തു. ഉന്നത പൊലീസ് ഉദ്യോഗസ്ഥരെ അപകീർത്തിപ്പെടുത്തണമെന്നും അതിനായി വാർത്തകൾ പ്രസിദ്ധീകരിക്കണമെന്നും എ എസ് ഐ രാധാകൃഷ്ണൻ ശ്രീകുമാറിനോട് ആവശ്യപ്പെട്ടിരുന്നു.

എന്നാൽ വാർത്ത നല്കണമെന്ന് പറഞ്ഞ് നൽകിയ വിവരങ്ങൾ ഉന്നത ഉദ്യോഗസ്ഥരോടുള്ള വ്യക്തി വൈരാഗ്യം മൂലമാണെന്നും, ബോധപൂർവ്വം കെട്ടിച്ചമച്ചതാണെന്നും മനസിലാക്കിയ ചീഫ് എഡിറ്റർ വാർത്ത പ്രസിദ്ധികരിക്കാൻ സാധിക്കില്ലന്ന് പറഞ്ഞു. രാധാകൃഷ്ണൻ നൽകിയ വിവരത്തിന്റെ അടിസ്ഥാനത്തിൽ തേർഡ് ഐ ന്യൂസ് ലൈവ് നടത്തിയ പരിശോധിയിലാണ് ആരോപണം അടിസ്ഥാന രഹിതമാണ് എന്നു കണ്ടെത്തിയത്.

തുടർന്ന് കഴിഞ്ഞ ദിവസം കഞ്ഞിക്കുഴിയിൽ വാഹന പരിശോധന നടത്തുകയായിരുന്ന രാധാകൃഷ്ണൻ ശ്രീകുമാറിനെ കണ്ടപ്പോൾ തടഞ്ഞു നിർത്തി അസഭ്യം പറയുകയായിരുന്നു.
തുടർന്ന് ശ്രീകുമാർ മുഖ്യമന്ത്രി പിണറായി വിജയന് പരാതി നല്കി. പരാതിയിൻമേൽ കർശന നടപടി സ്വീകരിക്കാൻ മുഖ്യമന്ത്രി ജില്ലാ പൊലിസ് മേധാവിയോട് നിർദ്ദേശിച്ചു.

തുടർന്ന് ഡിവൈഎസ്പി അനിൽകുമാറിന്റെ മേൽനോട്ടത്തിൽ ഈസ്റ്റ് സി ഐ ബിജോയി നടത്തിയ അന്വേഷണത്തിൽ രാധാകൃഷ്ണന്റെ ഭാഗത്ത് ഗുരുതര വീഴ്ച സംഭവിച്ചതായി കണ്ടെത്തി.തുടർന്നാണ് ജില്ലാ പൊലീസ് മേധാവി ഡി ശില്പ ഐപിഎസ് രാധാകൃഷ്ണനെ സസ്‌പെന്റ് ചെയ്തത്.

പൊലീസ് ഉദ്യോഗസ്ഥർക്കെതിരെ പേരില്ലാത്ത ‘മൊട്ടപ്പരാതി’ അയക്കുന്ന ഗൂഡ സംഘത്തിൽ ഉള്ളയാളാണ് രാധാകൃഷ്ണൻ എന്നാണ്  ലഭിക്കുന്ന വിവരം.