ഡ്യൂട്ടി കഴിഞ്ഞ് വീട്ടിലേക്കു സ്കൂട്ടറിൽ പോവുകയായിരുന്ന പോലീസ് ഉദ്യോഗസ്ഥയുടെ വള കവരാൻ ശ്രമം; യുവാവ് അറസ്റ്റിൽ
സ്വന്തം ലേഖകൻ
ചങ്ങനാശേരി: ഡ്യൂട്ടി കഴിഞ്ഞ് വീട്ടിലേക്കു സ്കൂട്ടറിൽ പോകുകയായിരുന്ന പോലീസ് ഉദ്യോഗസ്ഥയെ തടഞ്ഞു നിർത്തി വള കവരാൻ ശ്രമിച്ച കൈലാത്തുപടി സ്വദേശി സിറിയക് അറസ്റ്റിൽ.വ്യാഴാഴ്ച രാത്രി എട്ടിന് തൃക്കൊടിത്താനം- വെങ്കോട്ട റൂട്ടിൽ അമരയിൽ വച്ചാണ് സംഭവം.
തൃക്കൊടിത്താനം പോലീസ് സ്റ്റേഷനിൽനിന്നും ഡ്യൂട്ടി കഴിഞ്ഞ് കറുകച്ചാലിലുള്ള വീട്ടിലേക്കു മടങ്ങിയ വനിതാ പോലീസ് ദീപ്തി മാത്യുവിനു നേരേയാണ് അതിക്രമം ഉണ്ടായത്.
Whatsapp Group 1 | Whatsapp Group 2 |Telegram Group
പിന്നാലെ സ്കൂട്ടറിൽ എത്തിയ സിറിയക് അമര ഭാഗത്തുവച്ച്‌ ദീപ്തി സഞ്ചരിച്ചിരുന്ന സ്കൂട്ടറിനു മുമ്പിലെത്തി തടഞ്ഞു നിർത്തി കൈയിൽ ധരിച്ചിരുന്ന ബ്രേസ്‌ലറ്റ് പൊട്ടിച്ചെടുക്കാൻ ശ്രമിച്ചു. ദീപ്തി ബഹളം വച്ചപ്പോൾ ഇയാൾ രക്ഷപ്പെട്ടു.
പ്രതി സഞ്ചരിച്ച ബൈക്കിൻറെ രജിസ്റ്റർ നന്പർ ദീപ്തിയുടെ ശ്രദ്ധയിൽപ്പെടുകയും തൃക്കൊടിത്താനം പോലീസ് സ്റ്റേഷനിൽ വിവരം അറിയിക്കുകയും ചെയ്തു. ബൈക്കിൻറെ രജിസ്റ്റർ നമ്പർ പരിശോധിച്ച്‌ ഉടമയുടെ പേരു മനസിലാക്കുകയും സിറിയക്കിൻറെ വീട്ടിലെത്തി ഇയാളെ പിടികൂടുകയുമായിരുന്നു.
എസ്‌എച്ച്‌ഒ ഇ. അജീബ്, എസ്‌ഐ അനിൽകുമാർ, എഎസ് ഐമാരായ ഗിരീഷ്, ചന്ദ്രകുമാർ, സാബു എന്നിവരാണ് അറസ്റ്റിനു നേതൃത്വം നൽകിയത്. പ്രതിയെ റിമാൻഡ് ചെയ്തു.
