പന്തളത്ത് തോട്ടിൽ കണ്ടെത്തിയ അജ്ഞാത മൃതദേഹം തിരിച്ചറിഞ്ഞു; പന്തളം മുളങ്കുഴ സ്വദേശിയാണ് മരിച്ചത്; സംഭവം കൊലപാതകമെന്ന് പൊലീസ്

സ്വന്തം ലേഖകൻ
പത്തനംതിട്ട: പന്തളത്ത് കണ്ടെത്തിയ അജ്ഞാത മൃതദേഹം തിരിച്ചറിഞ്ഞു. പന്തളം മുളമ്പുഴ വലിയ തറയിൽ മൊട്ട വർഗീസ് എന്ന് വിളിക്കുന്ന വർഗീസ് ഫിലിപ്പാണ് (42) മരിച്ചത്. സംഭവം കൊലപാതകമാണെന്നാണ് പോലീസിന്റെ നിഗമനം.

കുന്നിക്കുഴി ജംഗ്ഷനിൽ പാറപ്പാട്ട് വയലിന് സമീപമുള്ള തോട്ടിൽ രാവിലെ 7 മണിയോടെയാണ് മൃതദേഹം കണ്ടെത്തിയത്.

ഡോഗ് സ്‌ക്വാഡും വിരൽ അടയാള വിദഗ്ദരും സംഭവസ്ഥലത്ത് എത്തി പരിശോധന നടത്തിയിരുന്നു. തുടർന്നുള്ള അന്വേഷണത്തിലാണ് മൃതദേഹം തിരിച്ചറിയാനായത്.

സംഘർഷത്തിനിടെ പരിക്കേറ്റതിന്റെ ലക്ഷണങ്ങൾ മൃതദേഹത്തിൽ കണ്ടെത്തിയിരുന്നു. ഇതാണ് കൊലപാതകമാണെന്ന നിരീക്ഷണത്തിൽ പോലീസ് എത്തിച്ചേരാൻ കാരണമായത്. നിലവിൽ മൃതദേഹം പോസ്റ്റ്‌മോർട്ടം നടപടികൾക്കായി എത്തിച്ചിരിക്കുകയാണ്.