‘ഒരു ഫോട്ടോയ്ക്ക് 39 രൂപ, ആവശ്യക്കാർ ടെലിഗ്രാമിൽ’: ക്ലാസ് മുറിയിൽ സഹപാഠികളുടെയും അധ്യാപകരുടെയും ചിത്രങ്ങൾ പകർത്തി സ്വന്തം ടെലിഗ്രാം ചാനലിലൂടെ വിൽപ്പന നടത്തിയ വിദ്യാർത്ഥി പിടിയിൽ

കോഴിക്കോട്: സഹപാഠികളുടേയും അധ്യാപകരുടെയും ചിത്രങ്ങൾ രഹസ്യമായി പകർത്തി സമൂഹമാധ്യമമായ ടെലിഗ്രാമിലൂടെ നടത്തിയ വിദ്യാർത്ഥി അറസ്റ്റിൽ. കോഴിക്കോട് സ്വകാര്യ സ്ഥാപനത്തിലെ വിദ്യാർത്ഥിയും തിക്കോടി സ്വദേശിയുമായ ആദിത്യദേവ് (18) നെയാണ് കസബ പോലീസ് അറസ്റ്റ് ചെയ്തത്.

ക്ലാസ് മുറികളിൽ നിന്ന് സഹപാഠികളുടേയും അദ്ധ്യാപകരുടെയും ശരീരഭാഗങ്ങൾ ആദിത്യദേവ് അവരറിയാതെ പകർത്തുകയായിരുന്നു. തുടർന്ന് ഈ ചിത്രങ്ങളെല്ലാം ഒരു ചിത്രത്തിന് 39 രൂപ എന്ന നിരക്കിൽ സ്വന്തം ടെലിഗ്രാം ചാനലിലൂടെ നടത്തി.

മിക്ക ഫോട്ടോകളിലും മുഖം അടക്കം പ്രദർശിപ്പിച്ചിട്ടുണ്ട്. പണം കൊടുത്ത് ഫോട്ടോ വാങ്ങിയാൽ ഇത് ഡൗൺലോഡ് ചെയ്ത് മറ്റിടങ്ങളിലേക്ക് ഷെയർ ചെയ്യാൻ സാധിക്കും. ഇതിൻ്റെ ചിത്രങ്ങൾ ഇൻസ്റ്റാഗ്രാമിലെ അശ്ലീല പേജിൽ എത്തിയതായാണ് വിവരം.

തുടർന്ന് വിദ്യാർത്ഥികൾ കോളേജിൽ പരാതി നൽകി. കോളേജ് മാനേജ്‌മെൻ്റ് കോഴിക്കോട് സൈബർ പോലീസ് സ്റ്റേഷനിലും കസബ പോലീസ് സ്റ്റേഷനിലും പരാതി നൽകി. വിദ്യാർത്ഥിയെ സ്ഥാപനത്തിൽ നിന്ന് സസ്പെൻഡ് ചെയ്തതായി മാനേജ്മെൻ്റ് അറിയിച്ചു. അതീവ ഗൗരവമുള്ള സ്വഭാവമുള്ള കുറ്റകൃത്യമായിട്ടും സ്റ്റേഷൻ ജാമ്യം ലഭിക്കാവുന്ന വകുപ്പുകൾ ചുമത്തി പോലീസ് പ്രതിയെ ജാമ്യത്തിൽ വിട്ടയച്ചു.