പി.സി ജോർജിനെ തോൽപ്പിച്ച് മുൻ ജില്ലാ പഞ്ചായത്ത് പ്രസിഡന്റ് അഡ്വ.സെബാസ്റ്റ്യൻ കുളത്തുങ്കൽ..! പൂഞ്ഞാർ തിരഞ്ഞെടുപ്പിന്റെ ട്രയലെന്നു കുളത്തുങ്കൽ; അല്ലെന്നു പി.സി ജോർജ്

സ്വന്തം ലേഖകൻ

കോട്ടയം: പൂഞ്ഞാർ എം.എൽ.എ പി.സി ജോർജിനെ തോൽപ്പിച്ച് മുൻ ജില്ലാ പഞ്ചായത്ത് പ്രസിഡന്റ് അഡ്വ.സെബാസ്റ്റിയൻ കുളത്തുങ്കൽ..! പക്ഷേ, തിരഞ്ഞെടുപ്പിന്റെ രാഷ്ട്രീയ ഗോദയിലല്ല പി.സി ജോർജും കുളത്തുങ്കലും ഏറ്റുമുട്ടിയത്. കോട്ടയം പ്രസ്‌ക്ലബിന്റെ ഷട്ടിൽ കോർട്ട് ഉദ്ഘാടന വേദിയിലാണ് ഇരുവരും തമ്മിൽ മുഖാമുഖം പോരടിച്ചത്. വരാനിരിക്കുന്ന തിരഞ്ഞെടുപ്പിന്റെ ട്രയൽ റണ്ണായ മത്സരത്തിൽ മുൻ ജില്ലാ പഞ്ചായത്ത് പ്രസിഡന്റിനായിരുന്നു ഒടുവിൽ വിജയം.

ഞായറാഴ്ച ഉച്ചയ്ക്ക് ഒരു മണിയോടെ കോട്ടയം പ്രസ്‌ക്ലബിന്റെ ഷട്ടിൽ കോർട്ടിലാണ് ഇരുവരും തമ്മിൽ മത്സരിച്ചത്. ഷട്ടിൽ കോർട്ട് ഉദ്ഘാടനത്തിനായാണ് പി.സി ജോർജും, മകൻ ഷോൺ ജോർജും, മുൻ ജില്ലാ പഞ്ചായത്ത് പ്രസിഡന്റ് അഡ്വ.സെബാസ്റ്റ്യൻ കുളത്തുങ്കലും എത്തിയത്. പി.സിയും ഷോണും ഒരു വശത്തും, കുളത്തുങ്കലും പള്ളിക്കത്തോട്ടിലെ കോൺഗ്രസ് നേതാവും തീയറ്റർ ഉടമയുമായ ജിജി അഞ്ചാനിയും മറുവശത്തുമായാണ് മത്സരിച്ചത്. മത്സരത്തിനു മുന്നോടിയായി കോർട്ട് നിശ്ചയിക്കുന്നതിനായി നടത്തിയ ടോസിങ്ങിലും ഭാഗ്യം സെബാസ്റ്റിയൻ കുളത്തുങ്കലിനൊപ്പമായിരുന്നു.

ആദ്യ സെറ്റിൽ പി.സി ജോർജ് ഏകപക്ഷീയമായി മുന്നേറിയെങ്കിൽ, പകുതി കഴിഞ്ഞതോടെ കുളത്തുങ്കലും ടീമും കളി തിരികെ പിടിച്ചെടുത്തു. പത്തു പോയിന്റിന് മത്സരിച്ചെങ്കിലും ഗെയിം പോയിന്റുകൾ ഒപ്പത്തിനൊപ്പം നേടിയതോടെ മത്സരം അവസാനിച്ചത് 14 പോയിന്റിലാണ്. 14 പോയിന്റ് ആദ്യം നേടിയ കുളത്തുങ്കലും ടീമും പി.സിയെയും പുത്രനെയും തറപറ്റിക്കുകയായിരുന്നു.

മത്സരത്തിനു ശേഷം ഇരുവരും മാധ്യമങ്ങളുടെ ചോദ്യത്തിന് മറുപടി പറയാനും ഒന്നിച്ചു നിന്നു. പൂഞ്ഞാർ നിയോജക മണ്ഡലത്തിൽ പി.സി ജോർജിനെതിരെ, ഇക്കുറി ഇടതു മുന്നണിയും കേരള കോൺഗ്രസും മുൻ ജില്ലാ പഞ്ചായത്ത് പ്രസിഡന്റായ അഡ്വ.സെബാസ്റ്റ്യൻ കുളത്തുങ്കലിനെയാണ് പരിഗണിക്കുന്നത് എന്ന അഭ്യൂഹം നിലവിലുണ്ട്. ഈ സാഹചര്യത്തിൽ ഇത് കൂടി ഉൾപ്പെടുത്തിയായിരുന്നു മാധ്യമപ്രവർത്തകരുടെ ചോദ്യം. പൂഞ്ഞാറിൽ നടക്കാനിരിക്കുന്ന തിരഞ്ഞെടുപ്പിന്റെ ട്രയലാണോ ഇവിടെ കണ്ടത് എന്ന ചോദ്യത്തിന് അല്ലെന്നായിരുന്നു പി.സി ജോർജിന്റെ മറുപടി. എന്നാൽ, പ്രസ്‌ക്ലബിൽ നടന്ന മത്സരവും ഫലവും പൂഞ്ഞാർ തിരഞ്ഞെടുപ്പിന്റേതിനു സമാനമായിരിക്കുമെന്നായിരുന്നു കുളത്തുങ്കലിന്റെ ആത്മവിശ്വാസത്തോടെയുള്ള മറുപടി. ഇരുവിഭാഗവും പൂഞ്ഞാർ നിയമസഭാ തിരഞ്ഞെടുപ്പിനുള്ള തന്ത്രങ്ങൾ ഒരുക്കിയെന്നു തന്നെയാണ് ഇതിൽ നിന്നും വ്യക്തമാകുന്നത്.