പലിശക്കാർക്കെതിരെ “ഓപ്പറേഷൻ ഷൈലോക്കുമായി” എറണാകുളം റേഞ്ച് പോലീസ്; 22 കേസുകൾ രജിസ്റ്റർ ചെയ്തു; കോട്ടയം ജില്ലയിൽ രജിസ്റ്റർ ചെയ്തത് ഒൻപത് കേസുകൾ

കൊച്ചി: പലിശക്കാർക്കെതിരെ ഓപ്പറേഷൻ “ഷൈലോക്കുമായി എറണാകുളം റേഞ്ച് പോലീസ്.

പരിശോധനയിൽ രജിസ്റ്റർ ചെയ്തത് 22 കേസുകൾ. എറണാകുളം റൂറൽ, ആലപ്പുഴ, കോട്ടയം, ഇടുക്കി ജില്ലകളിലായി ഡി ഐ ജി എസ് സതീഷ് ബിനോയുടെ നേതൃത്വത്തിൽ 298 ഇടങ്ങളിലാണ് പരിശോധന നടന്നത്.

കോട്ടയം 9, ഇടുക്കി 5. എറണാകുളം റൂറൽ 4, ആലപ്പുഴ 4 എന്നിങ്ങനെ 22′ ക്രിമിനൽ കേസുകൾ രജിസ്റ്റർ ചെയ്തു. അനധികൃത പലിശ ഇടപാടുകളിലൂടെ സമ്പാദിച്ച 39 ലക്ഷത്തോളം രൂപ പിടികൂടി.

7 കാറുകൾ, 13 ഇരുചക്രവാഹനങ്ങൾ ഉൾപ്പടെ 26 വാഹനങ്ങൾ, 62 മുദ്രപ്പത്രങ്ങൾ, 8 പ്രോമിസറിനോട്ടുകൾ, 86 ആർ സി ബുക്കുകൾ. 17 ആധാരങ്ങൾ കൂടാതെ മറ്റ് രേഖകളും പിടികൂടിയിട്ടുണ്ട്.

അതീവ രഹസ്യമായി ചൊവ്വാഴ്ച രാവിലെ 7 മണിക്ക് ആരംഭിച്ച പരിശോധന വൈകിയും തുടരുകയാണ്. രണ്ടായിരത്തോളം ഉദ്യോഗസ്ഥരാണ് പരിശോധനയിൽ പങ്കെടുക്കുന്നത്.