കോഴിക്കോട് മാവൂര്‍ ചാലിപ്പാടത്ത് മീന്‍പിടിക്കുന്നതിനിടെ തോണി മറിഞ്ഞ് ഒരാള്‍ മരിച്ചു

സ്വന്തം ലേഖകൻ

കോഴിക്കോട്: മാവൂര്‍ ചാലിപ്പാടത്ത് മീന്‍പിടിക്കുന്നതിനിടെ തോണി മറിഞ്ഞ് യുവാവ് മരിച്ചു. മലപ്രം സ്വദേശിയായ ഷാജുവാണ് മരിച്ചത്.

ഇന്നലെ രാത്രി 11 മണിക്കായിരുന്നു അപകടം. നെല്‍കൃഷിയും വാഴകൃഷിയുമെല്ലാം ചെയ്യുന്ന പ്രദേശമാണ് ചാലിപ്പാടം.

കോഴിക്കോട്ട് കനത്ത മഴയാണ്. അതിന്റെ ഭാഗമായി മാവൂരിന്റെ താഴ്ന്ന പ്രദേശങ്ങളെല്ലാം വെള്ളത്തിലാണ്. ഈ വെള്ളക്കെട്ടിലൂടെ പോകുന്നതിനിടയിലാണ് തോണി മറിഞ്ഞ് അപകടമുണ്ടായത്. രണ്ടു പേരും തോണി മറിഞ്ഞ് ചാലപ്പാടത്ത് വീണു.

സുഹൃത്ത് നീന്തി രക്ഷപെട്ടു. ഷാജു തോണിയുടെ അടിയില്‍പ്പെട്ടു. തുടര്‍ന്ന് നാട്ടുകാരെത്തി രക്ഷപ്പെടുത്തി കോഴിക്കോട് ആശുപത്രിയില്‍ എത്തിച്ചെങ്കിലും മരണം സംഭവിക്കുകയായിരുന്നു.