സ്വസ്ഥമായി ഒരു ബെല്ലി ഡാൻസ് നടത്തിയത് പൊല്ലാപ്പായി; എന്നാൽ കാശു മുടക്കി വാങ്ങിയ ബെൻസ് കാറും, ലോറികളും നാട്ടുകാരെ കാണിക്കാൻ ഒരു റോഡ് ഷോ നടത്താമെന്നു വച്ചാൽ ദേ.. അവിടേം പൊലീസ്; കൊവിഡ് നിയന്ത്രണങ്ങൾ ലംഘിച്ച് ബെൻസ് കാറിലും ലോറികളിലും റോഡ് ഷോ നടത്തിയ ബെല്ലി ഡാൻസ് വിവദ വ്യവസായി റോയി കുര്യനെതിരെ കേസ്; ബെല്ലി ഡാൻസിന് പുറമെ പട്ടിഷോയെന്ന് നാട്ടുകാർ
സ്വന്തം ലേഖകൻ
കോതമംഗലം: ഹോളിവുഡ് സിനിമകളിൽ മാത്രം കണ്ട് പരിചയമുള്ള ബെല്ലി ഡാൻസിനെ ഹൈറേഞ്ചിൽ അവതരിപ്പിച്ച് ശ്രദ്ധ നേടിയ വിവാദ വ്യവസായിയാണ് കോതമംഗലം തണ്ണിക്കോട് ഗ്രാനൈറ്റ്സ് ഉടമ റോയി കുര്യൻ. കൊവിഡ് നിയന്ത്രണങ്ങൾ നില നിൽക്കെ ആളുകളെ സംഘടിപ്പിച്ച് ഇടുക്കി രാജാപ്പാറയിലെ സ്വകാര്യ റിസോർട്ടിൽ നിശാപാർട്ടിയും ബെല്ലി ഡാൻസും നടത്തിയ കേസിൽ ഇയാളെ ഒരു മാസം മുമ്പ് അറസ്റ്റ് ചെയ്ത് വിട്ടയച്ചിരുന്നു. വിദേശത്ത് നിന്നും എത്തിച്ച നർത്തികിമാരെ പങ്കെടുപ്പിച്ച് നടത്തിയ നിശാപാർട്ടിയും, ബെല്ലി ഡാൻസും പൊലീസിനും ആരോഗ്യ വകുപ്പിനും തല വേദന സൃഷ്ടിച്ചിരുന്നു.
ബെല്ലി ഡാൻസ് വിവാദത്തിന്റെ ചൂടാറും മുമ്പേ വീണ്ടും പൊലീസ് വലയിരിക്കുകയാണ് വ്യവസായ പ്രമുഖൻ. ബെന്‍സ് കാറും ലോറികളും നിരത്തി റോഡ് ഷോ നടത്തിയ വിവാദ വ്യവസായിയുടെ വണ്ടികള്‍ പൊലീസ് കസ്റ്റഡിയിലെടുത്തു. ഒരു ബെന്‍സ് കാറും നാല് ലോറികളുമാണ് പിടിച്ചെടുത്തിരിക്കുന്നത്. അപകടകരമായി വാഹനമോടിക്കല്‍, കൊവിഡ് പ്രോട്ടോക്കോള്‍ ലംഘിക്കല്‍ എന്നീ വകുപ്പുകള്‍ ചുമത്തിയാണ് ഇയാളുടെ ബെന്‍സ് കാറും ലോറികളും പിടിച്ചെടുത്തത്. കേസില്‍ ഒരു വിട്ടുവീഴ്ചയും വേണ്ടെന്നും, കര്‍ശനനടപടി സ്വീകരിക്കണമെന്നും എസ്പി പൊലീസിന് നിര്‍ദേശം നല്‍കി. പിടിച്ചെടുത്ത വാഹനങ്ങളെല്ലാം കോടതിയില്‍ ഹാജരാക്കും.
Whatsapp Group 1 | Whatsapp Group 2 |Telegram Group
കോതമംഗലത്ത് ബെന്‍സ് കാറിന് പിന്നില്‍ എട്ട് ലോറികള്‍ കൂട്ടിക്കെട്ടിയാണ് റോയ് കുര്യന് റോഡിലൂടെ ‘ഷോ’ നടത്തിയത്. ഇന്നലെയാണ് റോയ് കുര്യന് പുതിയ ലോറികളും ബെന്‍സ് കാറും പുതുതായി ഡെലിവറി ലഭിച്ചത്. തുടര്‍ന്ന് ഈ കാറിന്റെയും ലോറികളുടെയും ഫോട്ടോഷൂട്ട് നടത്തി. ഭൂതത്താന്‍കെട്ട് അണക്കെട്ടിന് സമീപത്തായിരുന്നു ഫോട്ടോ ഷൂട്ട്. അതിന് ശേഷം, വാഹനങ്ങള്‍ നാട്ടുകാരെ കാണിക്കാനായി ഭൂതത്താന്‍ കെട്ടില്‍ നിന്ന് കോതമംഗലം വരെ കൂട്ടത്തോടെ റോഡ് ഷോയായി കൊണ്ടുവരികയായിരുന്നു.
ബെന്‍സ് കാറിന് മുകളില്‍ കയറി നാട്ടുകാരെ കൈവീശിക്കാണിച്ചാണ് റോയ് കുര്യന് റോഡിലൂടെ പോയത്. കോതമംഗലം ടൗണ്‍ മുഴുവന്‍ ഇയാള്‍ ഇതേരീതിയിൽ ‘ഷോ’ നടത്തി. തുടർന്ന് പൊലീസ് വിവരമറിഞ്ഞെത്തി. വാഹനങ്ങള്‍ തടഞ്ഞു. പുതിയ എട്ട് ലോറികളിലെ ഡ്രൈവര്‍മാര്‍ക്കും പിന്നിലുണ്ടായിരുന്ന ഒരു പഴയ ലോറിയിലെ ഡ്രൈവര്‍ക്കുമെതിരെ കേസെടുത്തു. ഒപ്പം റോയ് കുര്യനെതിരെയും കേസ് റജിസ്റ്റര്‍ ചെയ്തു. അപകടകരമായി വാഹനമോടിക്കൽ, കൊവിഡ് ചട്ടങ്ങള്‍ ലംഘിക്കൽ എന്നീ കുറ്റങ്ങള്‍ ചുമത്തിയാണ് കേസെടുത്തത്.
കഴിഞ്ഞ ജൂൺ 28നാണ് തണ്ണിക്കോട്ട് മെറ്റല്‍സിന്റെ ഉദ്ഘാടനത്തോട് അനുബന്ധിച്ച് സ്വകാര്യ റിസോര്‍ട്ടായ ജംഗിള്‍ പാലസില്‍ നിശാപാര്‍ട്ടിയും ബെല്ലി ഡാന്‍സും റോയ് കുര്യന് നടത്തിയത്. സ്ഥലത്തെ പ്രാദേശിക കോണ്‍ഗ്രസ് നേതാവടക്കം പാര്‍ട്ടിയില്‍ പങ്കെടുത്തിരുന്നു.
