പ്രതീക്ഷ വേണ്ട…..! ഇത്തവണ ഓണക്കിറ്റ് മഞ്ഞകാര്‍ഡ് ഉടമകള്‍ക്ക് മാത്രം; കിറ്റ് വിതരണം റേഷൻ കടകള്‍ വഴി; മന്ത്രിസഭാ യോഗത്തില്‍ തീരുമാനമായി

സ്വന്തം ലേഖിക

തിരുവനന്തപുരം: ഈ വര്‍ഷം ഓണത്തിന് സംസ്ഥാനത്തെ എ എ വൈ (അന്ത്യോദയ അന്ന യോജന) കാര്‍ഡ് ഉടമകള്‍ക്കും (മഞ്ഞകാര്‍ഡ്) ക്ഷേമസ്ഥാപനങ്ങളിലെ താമസക്കാര്‍ക്കും അവശ്യ സാധനങ്ങള്‍ ഉള്‍പ്പെടുത്തിയ സൗജന്യ ഓണക്കിറ്റ് വിതരണം ചെയ്യാൻ മന്ത്രിസഭാ യോഗം തീരുമാനിച്ചു.

ഇതിന് 32 കോടി രൂപ മുൻകൂറായി സപ്ലൈകോയ്ക്ക് അനുവദിക്കാനും നിശ്ചയിച്ചു. 6,07,691 കിറ്റുകളാണ് ഇത്തവണ വിതരണം ചെയ്യുക. 5,87,691 എ എ വൈ കാര്‍ഡുകളാണ് സംസ്ഥാനത്ത് നിലവിലുള്ളത്.
ക്ഷേമസ്ഥാപനങ്ങളിലെ താമസക്കാര്‍ക്ക് 20,000 കിറ്റുകളാണ് നല്‍കുക. റേഷൻ കടകള്‍ മുഖേനയാണ് കിറ്റ് വിതരണം ചെയ്യുക.

തേയില, ചെറുപയര്‍ പരിപ്പ്, സേമിയ പായസം മിക്സ്, നെയ്യ് , കശു അണ്ടി പരിപ്പ്, വെളിച്ചെണ്ണ,സാമ്പാര്‍പൊടി, മുളക് പൊടി, മഞ്ഞള്‍പൊടി , മല്ലിപ്പൊടി, ചെറുപയര്‍, തുവരപ്പരിപ്പ്, പൊടി ഉപ്പ്, തുണി സഞ്ചി എന്നിവയാണ് കിറ്റില്‍ ഉണ്ടാവുക.