സ്വന്തം ലേഖകന്‍
കാസര്‍ഗോഡ്: കാഞ്ഞങ്ങാട് ജില്ലാശുപത്രിയിലെ ഓപ്പറേഷന്‍ തീയേറ്ററിലെ ‘ആയുധ’പൂജ ചിത്രങ്ങള്‍ വൈറലാകുന്നു. ഓപ്പറേഷന്‍ തീയറ്ററിനുള്ളില്‍ പൂജ നടത്തിയതുമായി ബന്ധപ്പെട്ട് വിമര്‍ശനങ്ങളും ഉയരുന്നുണ്ട്. സയന്‍സ് അടിസ്ഥാനമാക്കി പ്രവര്‍ത്തിക്കുന്ന ഒരു സെക്കുലര്‍ സ്ഥാപനത്തില്‍ ഇത്തരം പ്രവര്‍ത്തികള്‍ അനുകൂലിക്കാനാവുന്നതല്ല എന്നാണ് ഭൂരിഭാഗത്തിന്റെയും വിമര്‍ശനം.
ഇത്തരം പ്രവണതകളുമായി ബന്ധപ്പെട്ട് ജിനേഷ് പിഎസ് പങ്കുവച്ച ഫേസ്ബുക്ക് കുറിപ്പ് വായിക്കാം,
Whatsapp Group 1 | Whatsapp Group 2 |Telegram Group
സര്‍ക്കാര്‍ മെഡിക്കല്‍ കോളേജുകളിലെ ചില വിഭാഗങ്ങളില്‍ എന്തിനാണ് പൂജ വെക്കുന്നത്? മെഡിക്കല്‍ സയന്‍സ് പ്രാക്ടീസ് ചെയ്യുന്ന ഇടങ്ങളില്‍ അന്ധവിശ്വാസത്തിന് സ്ഥാനമില്ല. തെളിവുകളുടെയും പഠനങ്ങളുടെയും അടിസ്ഥാനത്തില്‍ വളര്‍ന്ന് വികസിച്ച ശാസ്ത്രശാഖയാണ് മെഡിക്കല്‍ സയന്‍സ്. അവിടെ യാതൊരു തെളിവും അടിസ്ഥാനവുമില്ലാത്ത വിശ്വാസങ്ങള്‍ക്ക് സ്ഥാനമില്ല.
എന്നുമാത്രമല്ല, ഇത് ഒരു സെക്കുലര്‍ വേദി കൂടിയാണ്. അവിടെ ഏതെങ്കിലും ഒരു മതത്തിന്റേതായ വിശ്വാസങ്ങള്‍ക്കോ പൂജകള്‍ക്കോ സ്ഥാനം ഉണ്ടാവരുത്.
എന്തിനാണ് ഹിന്ദുമതവിശ്വാസപ്രകാരമുള്ള ഒരു ആചാരം ഒരു സര്‍ക്കാര്‍ മെഡിക്കല്‍ കോളേജിലെ ഡിപ്പാര്‍ട്ട്‌മെന്റില്‍ നടത്തുന്നത്?
ഇതൊക്കെ തീര്‍ച്ചയായും ഒഴിവാക്കേണ്ടതാണ്. വ്യക്തികള്‍ക്ക് ഏതു മതത്തില്‍ വിശ്വസിക്കാനും സ്വാതന്ത്ര്യമുണ്ട്. അതിലൊന്നും കൈകടത്താന്‍ ഒരു താല്പര്യവും ഇല്ല. പക്ഷേ വ്യക്തിപരമായ വിശ്വാസങ്ങളില്‍ പെടുന്ന പൂജകള്‍ ഒക്കെ സര്‍ക്കാര്‍ സ്ഥാപനങ്ങളിലേക്ക് എത്തിക്കുന്നത് ഒരു രീതിയിലും യോജിക്കാവുന്ന കാര്യമല്ല. അവരവരുടെ മതങ്ങള്‍ക്കും വിശ്വാസങ്ങള്‍ക്കും അനുസരിച്ചുള്ള പൂജകളും പൂജവെപ്പും ഒക്കെ സ്വന്തം വീട്ടില്‍ ആവട്ടെ.
ഒരു കാര്യം കൂടി, ഇന്നീ ലഭിക്കുന്ന വിദ്യാഭ്യാസം പൂജ വച്ച് നേടിയതല്ല. നിരവധിയായ പോരാട്ടങ്ങളിലൂടെയും ജനകീയമായ ഇടപെടലുകളിലൂടെയും നേടിയെടുത്തതാണ്. സാമൂഹ്യ അസമത്വങ്ങള്‍ തരണം ചെയ്ത് നേടിയെടുത്തതാണ്. സയന്‍സിന്റെ വളര്‍ച്ചയിലൂടെ കൈവരിച്ചതാണ്. അഖില്‍ ചാലില്‍ ഷെയര്‍ ചെയ്ത ഫോട്ടോ ചേര്‍ക്കുന്നു. ഇത് ഒരു സ്ഥലത്ത് മാത്രം നടക്കുന്ന കാര്യമല്ല. അതുകൊണ്ടുതന്നെ ഒരു സ്ഥലത്തെ മാത്രം എടുത്ത് കുറ്റപ്പെടുത്തുന്നില്ല. പക്ഷേ, സയന്‍സ് അടിസ്ഥാനമാക്കി പ്രവര്‍ത്തിക്കേണ്ട ഒരു സെക്കുലര്‍ സ്ഥാപനത്തില്‍ ഇത്തരം പ്രവണതകള്‍ അനുവദിച്ചുകൂടാ.
