മുംബൈ : നടി നിമിഷാ നായര് സഞ്ചരിച്ച കാർ തടഞ്ഞു നിർത്തി അതിക്രമം നടത്തിയ സംഭവത്തിൽ മുംബൈ പോലീസ് കേസെടുത്തു. നിമിഷാ നായരുടെ പരാതിയില് മുംബൈ ഖേര്വാഡി പൊലീസാണ് കേസെടുത്തത്. നടി സഞ്ചരിച്ച കാര് തടഞ്ഞ് ഭീഷണിപ്പെടുത്തിയതിനും ഉപദ്രവിക്കാന് ശ്രമിച്ചതിനുമാണ് കേസ്. യാത്രയ്ക്കിടെ ദുരനുഭവം ഉണ്ടായതിനെപ്പറ്റി നിമിഷ വീഡിയോ പങ്കുവെച്ചിരുന്നു. അതിന് പിന്നാലെയാണ് നടി പോലീസിൽ പരാതി നൽകിയത്. തുടർന്ന് മുംബൈ പോലീസ് യുവാക്കൾക്കെതിരെ കേസെടുക്കുകയായിരുന്നു.
ബാന്ദ്ര ഈസ്റ്റില് കേര്വാദി മേഖലയില് വെച്ചാണ് പുലര്ച്ചെ നാലരയോടെ നടിക്ക് നേരെ അതിക്രമമുണ്ടായത്. ബൈക്കിൽ സഞ്ചരിച്ച യുവാക്കളാണ് കേസിൽ പ്രതികൾ. ബൈക്ക് യാത്രികര് നിമിഷ സഞ്ചരിച്ച ഊബര് കാറിന് കുറുകെ വാഹനം കൊണ്ട് നിര്ത്തുകയും കാറിന്റെ ഡോര് വലിച്ചുതുറക്കാന് ശ്രമിക്കുകയും ചെയ്തു. ഹൈവേയുടെ മധ്യഭാഗത്ത് വെച്ചാണ് പരാക്രമം നടന്നതെന്നും ക്യാമറ പരിശോധിച്ചാല് കൃത്യമായി കാണാമെന്നും നിമിഷ വീഡിയോയില് പറഞ്ഞിരുന്നു. ഊബര് ഡ്രൈവറെ മോശം ഭാഷയില് കടുത്ത ചീത്ത വിളിക്കുന്നത് കേട്ടെന്നും സ്വയരക്ഷയ്ക്കായി താന് മിണ്ടാതിരുന്നെന്നും നടി പറയുന്നു. വീഡിയോ എടുക്കുന്നതുവരെ പ്രതികള് പരാക്രമം തുടര്ന്നെന്നും നടി വ്യക്തമാക്കി.
