കോട്ടയം: ദേശീയപാത 183 ചെങ്ങന്നൂർ മുതൽ കുമളിവരെയുള്ള നവീകരണത്തിന് വിശദ പദ്ധതി റിപ്പോര്‍ട്ട് തയാറാക്കാന്‍ പുതിയ കൺസൾട്ടൻസിയെ നിയോഗിക്കുന്നതിനുള്ള ടെൻഡർ ഒക്‌ടോബർ 17ന് തുറക്കുമെന്ന് ദേശീയപാതാ വിഭാഗം ജില്ലാവികസന സമിതിയോഗത്തെ അറിയിച്ചു.
ഡി.പി.ആർ. തയാറക്കുന്നതിനു മുമ്പ് എം.പിമാരുമായും എം.എൽ.എമാരുമായും ചര്‍ച്ച നടത്തണമെന്ന് മുൻ ജില്ലാവികസനസമിതി യോഗങ്ങളിൽ ജനപ്രതിനിധികൾ ആവശ്യപ്പെട്ടിരുന്നു. പുതിയ കൺസൾട്ടൻസി വരുമ്പോൾ ഇക്കാര്യം ഉറപ്പാക്കുന്നതിന് നടപടി സ്വീകരിച്ചിട്ടുണ്ടെന്നും ദേശീയ പാത അധികൃതർ വ്യക്തമാക്കി.
ജില്ലയിൽ ഓടകൾ നിറഞ്ഞു റോഡില്‍ വെളളക്കെട്ട് ഉണ്ടാകുന്ന സ്ഥലങ്ങൾ കണ്ടെത്തി അതു പരിഹരിക്കുന്ന രീതിയില്‍ റോഡു നിർമാണത്തിന് എസ്റ്റിമേറ്റ് തയാറാക്കണമെന്ന് ഗവണ്‍മെന്‍റ് ചീഫ് വിപ്പ് ഡോ. എന്‍. ജയരാജ് നിര്‍ദേശിച്ചു. ഇരുപത്തിയാറാം മൈൽ പാലത്തിന്‍റെ നിർമാണത്തിനായി സ്ഥലം ഏറ്റെടുക്കുന്നതുമായി ബന്ധപ്പെട്ട തടസങ്ങള്‍ ഒഴിവാക്കാനും പ്രദേശവാസികൾക്കും കച്ചവടക്കാർക്കുമുള്ള ബുദ്ധിമുട്ടുകള്‍ പരിഹരിക്കാനും ഡിസൈൻ പുതുക്കണമെന്ന ഡോ. എൻ. ജയരാജിന്‍റെ നിർദേശം പരിശോധിച്ച് നടപടി സ്വീകരിക്കുമെന്ന് പൊതുമരാമത്ത് പാലം വിഭാഗം അറിയിച്ചു.
Whatsapp Group 1 | Whatsapp Group 2 |Telegram Group
മഴക്കാലത്ത് റോഡുകൾ വെട്ടിപ്പൊളിക്കുന്നതിനെതിരേ നടപടി സ്വീകരിക്കണമെന്നും നിർദേശങ്ങൾ ലംഘിച്ചു പൊളിച്ച റോഡുകൾ പൂർവസ്ഥിതിയിലാക്കുന്നതിന് അടിയന്തര നടപടി സ്വീകരിക്കണമെന്നും തിരുവഞ്ചൂർ രാധാകൃഷ്ണൻ എംഎൽഎ ആവശ്യപ്പെട്ടു. ഇറഞ്ഞാൽ തിരുവഞ്ചൂർ റോഡിലെ അറ്റകുറ്റപ്പണികൾ വേഗത്തിൽ പൂർത്തീകരിക്കണമെന്നും അദ്ദേഹം ആവശ്യപ്പെട്ടു.
ജില്ലാ ആസൂത്രണസമിതി കോൺഫറൻസ് ഹാളിൽ നടന്ന ജില്ലാ വികസനസമിതി യോഗത്തിൽ ജില്ലാ കളക്ടർ ചേതൻ കുമാർ മീണ അധ്യക്ഷത വഹിച്ചു. എഡിഎം എസ്. ശ്രീജിത്ത്, ജില്ലാ പ്ലാനിംഗ് ഓഫീസർ എം.പി. അനിൽകുമാർ, അഡ്വ. ഫ്രാൻസിസ് ജോർജ് എംപിയുടെ പ്രതിനിധി ടി.വി. സോണി എന്നിവർ പങ്കെടുത്തു.
