ന്യൂഡൽഹി: നടനും രാഷ്ട്രീയ പ്രവർത്തകനുമായ കൃഷ്ണകുമാറും കുടുംബവും പ്രധാനമന്ത്രി നരേന്ദ്ര മോദിയെ സന്ദർശിച്ചതിന്റെ വാർത്തകൾക്ക് പിന്നാലെ, കൂടിക്കാഴ്ചയിലെ ഏറ്റവും ഹൃദ്യമായ നിമിഷം പങ്കുവച്ച് പ്രധാനമന്ത്രി നരേന്ദ്ര മോദി.
കൃഷ്ണകുമാറിന്റെ മകൾ ദിയ കൃഷ്ണയുടെ മകൻ ‘ഓമി’ എന്ന് വിളിക്കുന്ന നിയോം അശ്വിന്റെ ചിത്രം പ്രധാനമന്ത്രി തന്റെ ഔദ്യോഗിക സോഷ്യൽ മീഡിയ അക്കൗണ്ടുകളിലൂടെയാണ് പുറത്തുവിട്ടത്. “ഇന്നലെ 7 ലോക് കല്യാൺ മാർഗിലെത്തിയ ഒരു യുവ സുഹൃത്തിനൊപ്പം” എന്ന അടിക്കുറിപ്പോടെയാണ് മോദി കുഞ്ഞു ഓമിയെ താലോലിക്കുന്ന ചിത്രം പോസ്റ്റ് ചെയ്തത്.
100 മില്യൻ ഫോളോവേഴ്സുള്ള മോദിയുടെ അക്കൗണ്ടിലൂടെ ഓമി ഇനി ലോകശ്രദ്ധനേടുമെന്നാണ് പ്രേക്ഷകർ പറയുന്നത്. പ്രധാനമന്ത്രിയുടെ ഈ പോസ്റ്റിന് താഴെ കൃഷ്ണകുമാറിന്റെ കുടുംബാംഗങ്ങൾ നേരിട്ടെത്തി സന്തോഷം പങ്കുവെച്ചത് ആരാധകർക്കിടയിൽ വലിയ ശ്രദ്ധ പിടിച്ചുപറ്റിയിട്ടുണ്ട്. ലോകനേതാക്കൾ എത്തുന്ന പ്രധാനമന്ത്രിയുടെ ഔദ്യോഗിക വസതിയിൽ വെച്ച് നടന്ന ഈ സ്നേഹനിമിഷം ഇതിനോടകം തന്നെ സോഷ്യൽ മീഡിയയിൽ തരംഗമായിക്കഴിഞ്ഞു.
Whatsapp Group 1 | Whatsapp Group 2 |Telegram Group
അഹാന കൃഷ്ണ, ഇഷാനി, ദിയ കൃഷ്ണ, സിന്ധു കൃഷ്ണ, അശ്വിൻ ഗണേഷ് എന്നിവരെല്ലാം പ്രധാനമന്ത്രിയുടെ പോസ്റ്റിന് താഴെ കമന്റുകളുമായി എത്തി. തങ്ങളുടെ കുടുംബത്തിന് ലഭിച്ച ഈ വലിയ അംഗീകാരത്തിലും കുഞ്ഞു ഓമിയോടുള്ള പ്രധാനമന്ത്രിയുടെ വാത്സല്യത്തിലും അവർ നന്ദിയും സന്തോഷവും രേഖപ്പെടുത്തി.
ഒരു ലോകനേതാവ് എന്നതിലുപരി തികച്ചും സാധാരണക്കാരനായി കുഞ്ഞിനോട് ഇടപഴകുന്ന പ്രധാനമന്ത്രിയുടെ രീതിയെ പ്രശംസിച്ച് നിരവധി പേരാണ് ചിത്രത്തിന് താഴെ കമന്റുകളുമായി എത്തുന്നത്.
