നാദാപുരത്ത് സ്വകാര്യ ബസിൽ സ്കൂൾ വിദ്യാർഥിനിയെ ശല്യം ചെയ്ത സംഭവം; പ്രതി അറസ്റ്റിൽ

സ്വന്തം ലേഖകൻ

നാദാപുരം: സ്വകാര്യ ബസിൽ യാത്ര ചെയ്യുകയായിരുന്ന സ്കൂൾ വിദ്യാർഥിനിയെ ശല്യം ചെയ്ത് ഇറങ്ങിയോടി രക്ഷപ്പെട്ട പ്രതി അറസ്റ്റിൽ. ഓട്ടോ ഡ്രൈവർ പേരോട് സ്വദേശി മീത്തലായി മുഹമ്മദ് (38) ആണ് അറസ്റ്റിലായത്.

കഴിഞ്ഞ ദിവസം തലശ്ശേരി ഭാഗത്ത് നിന്ന് നാദാപുരം ഭാഗത്തേക്ക് വരികയായിരുന്ന സ്വകാര്യ ബസ്സിൽ യാത്ര ചെയ്യുകയായിരുന്ന വിദ്യാർഥിനിയെയാണ് പ്രതി ശല്യം ചെയ്തത്.

സ്റ്റാൻഡിലിറങ്ങിയ വിദ്യാർഥിനി പ്രതിയെ തടഞ്ഞ് നിർത്താൻ ശ്രമിച്ചെങ്കിലും ഇയാൾ തള്ളി മാറ്റി ഓടി രക്ഷപ്പെടുകയായിരുന്നെന്ന് ദൃക്സാക്ഷികൾ പറഞ്ഞു.

സ്റ്റാന്‍റിനക ത്തെ വ്യാപാര സ്ഥാപനങ്ങളിൽ സ്ഥാപിച്ച ക്യാമറകളിൽ യുവാവ് ഓടി പോകുന്ന ദൃശ്യങ്ങൾ ശേഖരിച്ച പോലീസ് പ്രതിയെ പിടികൂടുകയായിരുന്നു. 50 ലേറെ സി സി ടി വി ദൃശ്യങ്ങളാണ് അന്വേഷണത്തിന്‍റെ ഭാഗമായി പോലീസ് ശേഖരിച്ചത്.