മൂവാറ്റുപുഴ: മൂവാറ്റുപുഴ വാളകത്ത് വീട്ടുവളപ്പില് കാറും സ്കൂട്ടറും കത്തി നശിച്ച സംഭവം ഷോർട്ട് സർക്യൂട്ട് മൂലമെന്ന് പ്രാഥമിക നിഗമനം.
കഴിഞ്ഞ ചൊവ്വാഴ്ചയാണ് മാസങ്ങളായി ആൾതാമസം ഇല്ലാതിരുന്ന വീട്ടിൽ തീപിടിത്തമുണ്ടായത്. അപകടത്തിൽ ലക്ഷങ്ങളുടെ നാശനഷ്ടമാണ് കണക്കാക്കുന്നത്.
അമേരിക്കയില് താമസിക്കുന്ന വില്സണ് വർഗീസിന്റെ വീട്ടിലാണ് തീപിടിത്തമുണ്ടായത്. മറ്റൊരു വീട് വാടകയ്ക്കെടുത്ത് ഇവിടെ പഴയ സാധന സാമഗ്രികള് സൂക്ഷിച്ചിരിക്കുകയായിരുന്നു വില്സണ്. വീടിന്റെ കാർ പോർച്ചിലുണ്ടായിരുന്ന ബൈക്കിനും കാറിനും തീപിടിച്ചതിന് പുറമെ, ജനല് വഴി തീ അകത്തേക്ക് പടർന്ന് നിരവധി വസ്തുക്കള് കത്തി നശിച്ചു.
Whatsapp Group 1 | Whatsapp Group 2 |Telegram Group
ഇതേത്തുടർന്ന് വിവരമറിഞ്ഞ് എത്തിയ മൂവാറ്റുപുഴ അഗ്നിരക്ഷാ സേനയുടെ നേതൃത്വത്തിലുള്ള സംഘം സ്ഥലത്തെത്തി തീ നിയന്ത്രണവിധേയമാക്കി. ഏകദേശം നാല്പത് മിനിറ്റോളമെടുത്താണ് തീ അണച്ചത്. സംഭവത്തിന് പിന്നാലെ പോലീസ് സ്ഥലത്തെത്തി മേല് നടപടികള് സ്വീകരിച്ചിട്ടുണ്ട്. ഷോർട്ട് സർക്യൂട്ട് മൂലമുള്ള അപകടങ്ങള് ഈയിടെ വർധിക്കുന്ന സാഹചര്യത്തില്, സംഭവത്തില് വിശദമായ അന്വേഷണം പുരോഗമിക്കുകയാണെന്ന് പോലീസ് അറിയിച്ചു.
