പത്തനംതിട്ട: മോഹൻലാലിനൊപ്പം ശബരിമല കയറിയ പൊലീസ് ഉദ്യോഗസ്ഥന് സ്ഥലംമാറ്റം. തിരുവല്ല എസ്എച്ച്ഒ ബി സുനിലിനെയാണ് സ്ഥലംമാറ്റിയത്. മോഹൻലാൽ ശബരിമല ദർശനം നടത്തിയതിന്റെ തൊട്ടടുത്ത ദിവസം എസ്എച്ച്ഒയെ സ്ഥലം മാറ്റിയിരുന്നു.
ഇതിന് പിന്നാലെ കാരണംകാണിക്കൽ നോട്ടിസും നൽകിയിട്ടുണ്ട്. തിരുവല്ല ഡിവൈഎസ്പിയാണ് വിശദീകരണം തേടിയത്. മോഹൻലാലിനൊപ്പം മലകയറുന്നുവെന്ന വിവരം മറച്ചുവച്ച് ശബരിമല ദർശനത്തിന് പ്രത്യേക അനുമതി തേടിയെന്ന കാരണത്താലാണ് ഉദ്യോഗസ്ഥനെ സ്ഥലംമാറ്റിയത്.
വളരെക്കാലമായി ശബരിമലയിൽ പോകാൻ ആഗ്രഹിക്കുന്നുവെന്ന് ചൂണ്ടിക്കാട്ടിയാണ് ഉദ്യോഗസ്ഥൻ ദർശനത്തിന് അനുമതി തേടിയത്. സത്യാവസ്ഥ ബോധപൂർവ്വം മറച്ചുവച്ചുവെന്നതാണ് ആരോപണം മാർച്ച് 18-നാണ് മോഹൻലാൽ ശബരിമലയിലെത്തിയത്. എമ്പുരാന്റെ റിലീസിന് മുന്നോടിയായിരുന്നു ദർശനം. ഇരുമുടികെട്ടുമേന്തി പതിനൊട്ടാം പടി കയറുന്ന മോഹൻലാലിന്റെ ചിത്രങ്ങളും വീഡിയോകളും സമൂഹമാദ്ധ്യമങ്ങളിലൂടെ പുറത്തുവന്നിരുന്നു.
Whatsapp Group 1 | Whatsapp Group 2 |Telegram Group