കേന്ദ്രമന്ത്രി സ്മൃതി ഇറാനിക്ക് വീണ്ടും കൊറോണ ; കഴിഞ്ഞ അഞ്ച് ദിവസമായി രാജ്യതലസ്ഥാനത്ത് പ്രതിദിന രോഗികൾ ആയിരത്തിന് മുകളിൽ

സ്വന്തം ലേഖിക

ന്യൂഡൽഹി: കേന്ദ്ര വനിതാ ശിശുക്ഷേമ മന്ത്രി സ്മൃതി ഇറാനിക്ക് വീണ്ടും കൊറോണ സ്ഥിരീകരിച്ചു. ഇത് രണ്ടാം തവണയാണ് മന്ത്രിക്ക് കൊറോണ സ്ഥിരീകരിക്കുന്നത്. ഡൽഹിയിൽ ബിജെപി സംഘടിപ്പിച്ച പരിപാടിയിൽ പങ്കെടുക്കാൻ കഴിയില്ലെന്ന് ചൂണ്ടിക്കാട്ടിയാണ് സ്മൃതി ഇറാനി രോഗവിവരം അ‌റിയിച്ചത്.

നേരത്തെ 2020-ലായിരുന്നു രോഗം ബാധിച്ചത്. നിയമസഭാ ഉപതെരഞ്ഞെടുപ്പിന് മുന്നോടിയായി ജൂൺ 23-ന് സംഘടിപ്പിച്ച ചടങ്ങിനെത്താൻ കഴിയുകയില്ലെന്ന് കേന്ദ്രമന്ത്രി അ‌റിയിക്കുകയായിരുന്നു.

അതേസമയം രാജ്യത്ത് കൊറോണ വ്യാപനം വർധിച്ച് വരികയാണ്. രാജ്യതലസ്ഥാനമായ ഡൽഹിയിലും രോഗബാധിതർ കൂടുതലാണ്. ഞായറാഴ്ച 1,530 പേർക്കാണ് ഡൽഹിയിൽ മാത്രം രോഗം സ്ഥിരീകരിച്ചത്. കഴിഞ്ഞ അഞ്ച് ദിവസമായി രാജ്യതലസ്ഥാനത്ത് ആയിരത്തിന് മുകളിൽ പ്രതിദിന രോഗികളാണ് റിപ്പോർട്ട് ചെയ്യുന്നത്.