വിവാഹശേഷം പുരുഷന്മാരില്‍ പൊണ്ണത്തടി വരാൻ മൂന്നിരട്ടി സാദ്ധ്യത; പഠനം
എത്ര മെലിഞ്ഞിരിക്കുന്നവരായാലും വിവാഹം കഴിഞ്ഞാല്‍ സ്ത്രീകൾ വണ്ണം വയ്ക്കുമെന്നാണ് പറയപ്പെടുന്നത്. എന്നാല്‍ പുതിയ പഠനം വ്യക്തമാക്കുന്നത് വിവാഹശേഷം വണ്ണം വയ്ക്കുന്നത് പുരുഷന്മാരാണ് എന്നാണ്.
വിവാഹശേഷം പുരുഷന്മാരില്‍ പൊണ്ണത്തടി വരാൻ മൂന്നിരട്ടി സാദ്ധ്യതയുണ്ടെന്നാണ് പുതിയ പഠനത്തില്‍ വ്യക്തമാക്കുന്നത്.
പോളണ്ടിലെ നാഷണല്‍ ഇൻസ്റ്റിട്ട്യൂട്ട് ഒഫ് കാർഡിയോളജിയിലെ ഗവേഷകരാണ് പഠനം നടത്തിയത്. 1990ന് ശേഷം ആഗോളതലത്തില്‍ പൊണ്ണത്തടിക്കാരുടെ എണ്ണം വർദ്ധിച്ചതായി പഠനത്തില്‍ പറയുന്നു. 2050 ആകുമ്ബോഴേയ്ക്കും ലോകത്തിലെ പകുതിയോളം ചെറുപ്പക്കാരും കുട്ടികളും പൊണ്ണത്തടിയുള്ളവരായി മാറുമെന്നും പഠനത്തില്‍ വ്യക്തമാക്കുന്നു.
Whatsapp Group 1 | Whatsapp Group 2 |Telegram Group
50 വയസില്‍ താഴെയുള്ള 2405 പേരിലാണ് പഠനം നടത്തിയത്. വിവാഹിതരായ പുരുഷന്മാർക്ക് അവിവാഹിതരായ പുരുഷന്മാരേക്കാള്‍ 3.2 മടങ്ങ് പൊണ്ണത്തടി ഉണ്ടാകാനുള്ള സാദ്ധ്യതയുണ്ടെന്ന് പഠനത്തില്‍ കണ്ടെത്തിയതായി ഗവേഷകർ വ്യക്തമാക്കി. വിവാഹിതരായ സ്ത്രീകളില്‍ പൊണ്ണത്തടി സാദ്ധ്യതയില്‍ വർദ്ധനവുണ്ടായില്ല. വിവാഹിതരായ പുരുഷന്മാരില്‍ അമിതഭാരത്തിനുള്ള സാദ്ധ്യത 62 ശതമാനവും സ്ത്രീകളില്‍ 39 ശതമാനവുമാണ് വർദ്ധിച്ചത്.
ഉയർന്ന കലോറി ഉപഭോഗവും കുറഞ്ഞ വ്യായാമവും കാരണം വിവാഹത്തിന് ശേഷമുള്ള ആദ്യത്തെ അഞ്ച് വർഷം പുരുഷന്മാരുടെ ബിഎംഐ (ബോഡി മാസ് ഇൻഡക്‌സ്) വർദ്ധിക്കുന്നതായി 2024ല്‍ ചൈനയില്‍ നടത്തിയ ഒരു പഠനത്തില്‍ കണ്ടെത്തിയിരുന്നു. വിവാഹിതരായ പുരുഷന്മാരില്‍ അമിതഭാരമുള്ളവരുടെ എണ്ണത്തില്‍ 5.2 ശതമാനം വർദ്ധനവും പൊണ്ണത്തടിയുള്ള പുരുഷന്മാരില്‍ 2.5 ശതമാനം വർദ്ധനവും ഉണ്ടായതായി കണ്ടെത്തി. വിവാഹിതരായ പുരുഷന്മാർ അവിവാഹിതരായ പുരുഷന്മാരേക്കാള്‍ ശരാശരി 1.4 കിലോഗ്രാം ഭാരമുള്ളവരാണെന്ന് ബാത്ത് സർവകലാശാല നടത്തിയ പഠനത്തിലും കണ്ടെത്തിയിരുന്നു. ഭക്ഷണത്തിന്റെ അളവ് കൂടുന്നത്, അനാരോഗ്യകരമായ ഭക്ഷണങ്ങള്‍, കുടുംബത്തോടൊപ്പവും സുഹൃത്തുക്കളും മറ്റുമായി ഒരുമിച്ചുള്ള ഭക്ഷണം കഴിക്കുന്നതിലെ വർദ്ധനവ്, ശാരീരിക പ്രവർത്തനങ്ങള്‍ കുറയുന്നത്, സമ്മർദ്ദമേറിയ തൊഴില്‍ തുടങ്ങിയ ഘടകങ്ങളാണ് വിവാഹിതരായ പുരുഷന്മാരില്‍ പൊണ്ണത്തടിയുണ്ടാകാനുള്ള കാരണമായി ചൂണ്ടിക്കാട്ടുന്നത്.
