സീരിയല്‍ നടി എംഡിഎംഎയുമായി അറസ്റ്റിലായ സംഭവത്തിൽ ലഹരി മരുന്ന് എത്തിച്ച്‌ നല്‍കിയിരുന്ന യുവാവും പിടിയിൽ; നടി എംഡിഎംഎ വാങ്ങിയത് സ്വന്തം ആവശ്യത്തിന്; യുവാവിനെ പരിചയപ്പെട്ടത് ബീച്ചിൽവച്ച്; ലഹരി മരുന്ന് വില്‍പനയിലൂടെ ബന്ധം വളർന്നു; കേസിൽ കൂടുതൽ വിവരങ്ങൾ പുറത്ത്
കൊല്ലം: ഷംനത്ത് എന്ന കൊല്ലം സ്വദേശിയായ സീരിയല്‍ നടി എംഡിഎംഎയുമായി അറസ്റ്റിലായ സംഭവത്തില്‍ ലഹരി മരുന്ന് എത്തിച്ച്‌ നല്‍കിയിരുന്ന യുവാവും പിടിയിലായതോടെ കൂടുതല്‍ വിവരങ്ങള്‍ പുറത്ത്. ഇക്കഴിഞ്ഞ ഒക്ടോബർ 18നാണ് പരവൂർ ചിറക്കരയിലെ വീട്ടില്‍ നിന്ന് എംഡിഎംഎയുമായി സീരിയല്‍ നടിയായ ഷംനത്തിനെ അറസ്റ്റ് ചെയ്തത്.
സ്വന്തം ആവശ്യത്തിന് ഉപയോഗിക്കുന്നതിന് വേണ്ടിയാണ് എംഡിഎംഎ വാങ്ങിയതെന്നായിരുന്നു നടിയുടെ മൊഴി. കടയ്ക്കല്‍ സ്വദേശിയായ നവാസാണ് ലഹരി മരുന്ന് നല്‍കിയതെന്ന് നടി പറഞ്ഞിരുന്നു. ഷംനത്ത് പിടിയിലായതറിഞ്ഞ് ഒളിവില്‍ പോയ നവാസിനെ രഹസ്യ നീക്കത്തിലൂടെ പോലീസ് പിടികൂടി.
തെക്കൻ കേരളത്തിലെ ലഹരിമരുന്ന് ശൃംഖലയിലെ പ്രധാനിയാണ് നവാസ്. താൻ നേരിട്ടാണ് നടിക്ക് എംഡിഎംഎ എത്തിച്ചു നല്‍കിയിരുന്നതെന്ന് പ്രതി സമ്മതിച്ചു. പാർവതി എന്ന പേരില്‍ അറിയപ്പെടുന്ന ഷംനത്തുമായി വർക്കല ബീച്ചില്‍ വച്ചാണ് നവാസ് പരിചയപ്പെടുന്നത്.
Whatsapp Group 1 | Whatsapp Group 2 |Telegram Group
36 കാരിയായ ഷംനത്ത് സ്ഥിരമായി ലഹരിമരുന്ന് ഉപയോഗിച്ചിരുന്നു. എംഡിഎംഎ വാങ്ങുന്നതിന് വേണ്ടിയാണ് നടി വർക്കല എത്തിയിരുന്നത്. വർക്കല കേന്ദ്രീകരിച്ചാണ് നവാസിൻ്റെ ലഹരി മരുന്ന് കച്ചവടം. ലഹരി മരുന്ന് വില്‍പനയിലൂടെ ഷംനത്തും നവാസും തമ്മില്‍ സൗഹൃദത്തിലായി. പതിയെ നവാസിൻ്റെ നാടായ കടയ്ക്കലില്‍ എത്തിയും ഒന്നാം പ്രതി ഷംനത്ത് എംഡിഎംഎ വാങ്ങാൻ ആരംഭിച്ചു.
