അപൂർവ ഭൌമ ധാതുക്കളുടെ ക്ഷാമം കാരണം മാരുതി സുസുക്കി തങ്ങളുടെ ആദ്യ ഇലക്ട്രിക് വാഹനമായ ഇ-വിറ്റാരയുടെ ദീർഘകാല ഉൽപാദന ലക്ഷ്യങ്ങൾ മൂന്നിൽ രണ്ട് ആയി കുറച്ചതായി റിപ്പോർട്ട്. ചൈനയുടെ കയറ്റുമതി നിയന്ത്രണങ്ങൾ വാഹന വ്യവസായത്തെ ബാധിക്കുന്നതിന്റെ ഏറ്റവും പുതിയ സൂചനയാണിത്. ഏപ്രിൽ മുതൽ സെപ്റ്റംബർ വരെയുള്ള കാലയളവിൽ 26,500 ആ ഇലക്ട്രിക്ക് വിറ്റാരകൾ നിർമ്മിക്കുകയായിരുന്നു കമ്പനിയുടെ ലക്ഷ്യം. എന്നാൽ പുതിയ സാഹചര്യത്തിൽ ഏകദേശം 8,200 ഇ-വിറ്റാരകൾ നിർമ്മിക്കാനാണ് പുതിയ പദ്ധതി എന്ന് റോയിട്ടേഴ്‌സിനെ ഉദ്ദരിച്ച് എൻഡിടിവി റിപ്പോർട്ട് ചെയ്യുന്നു.
ഈ സാഹചര്യത്തെക്കുറിച്ച് ഔദ്യോഗികമായി പ്രതികരിക്കാൻ കമ്പനി തീരുമാനിച്ചിട്ടില്ല. മാരുതി സുസുക്കി ഇന്ത്യയുടെ ചെയർമാൻ ആർ സി ഭാർഗവ ഈ ആഴ്ചയുടെ തുടക്കത്തിൽ, അപൂർവ എർത്ത് മാഗ്നറ്റുകളുടെ ക്ഷാമം നിലവിൽ കമ്പനിയുടെ ഉൽ‌പാദനത്തെ സ്വാധീനിച്ചിട്ടില്ലെന്ന് പറഞ്ഞിരുന്നു. അപൂർവ എർത്ത് മൂലകങ്ങളുടെയും അവയുമായി ബന്ധപ്പെട്ട കാന്തങ്ങളുടെയും കയറ്റുമതി സംബന്ധിച്ച് ഏപ്രിൽ നാലിന് ചൈനീസ് സർക്കാർ നിയന്ത്രണങ്ങൾ ഏർപ്പെടുത്തിയതുമുതൽ ആഭ്യന്തര കാർ നിർമ്മാണ കമ്പനികൾ കടുത്ത വെല്ലുവിളികൾ നേരിടുന്നുണ്ട്. പുതിയ ചട്ടങ്ങൾ അനുസരിച്ച് ഏഴ് പ്രധാന അപൂർവ എർത്ത് മൂലകങ്ങൾക്ക് പ്രത്യേക കയറ്റുമതി ലൈസൻസുകൾ ആവശ്യമാണ്.
2026 മാർച്ചിൽ അവസാനിക്കുന്ന വർഷത്തിൽ 67,000 ഇലക്ട്രിക് വാഹനങ്ങൾ എന്ന ഉൽപ്പാദന ലക്ഷ്യം കൈവരിക്കാനാണ് മാരുതി ഇപ്പോഴും പദ്ധതിയിടുന്നതെന്ന് റോയിട്ടേഴ്സ് രേഖയിൽ പറയുന്നു. ചില അപൂർവ എർത്ത് കയറ്റുമതിയിൽ ചൈന ഏർപ്പെടുത്തിയ നിയന്ത്രണങ്ങൾ ആഗോള വാഹന വ്യവസായത്തെ പിടിച്ചുകുലുക്കി, വിതരണ ശൃംഖലയിൽ കടുത്ത തടസ്സങ്ങൾ ഉണ്ടാകുമെന്ന് കമ്പനികൾ മുന്നറിയിപ്പ് നൽകിയിട്ടുണ്ട്. അമേരിക്ക, യൂറോപ്പ്, ജപ്പാൻ എന്നിവിടങ്ങളിലെ ചില കമ്പനികൾ ബീജിംഗിൽ നിന്ന് ലൈസൻസുകൾ നേടുന്നതോടെ വിതരണത്തിൽ അയവ് വരുത്തുന്ന പ്രവണത കാണുമ്പോൾ, ഉൽപ്പാദനം നിർത്തിവയ്ക്കുമെന്ന ആശങ്കകൾക്കിടയിൽ ഇന്ത്യ ഇപ്പോഴും ചൈനയുടെ അംഗീകാരത്തിനായി കാത്തിരിക്കുകയാണ്. ഇലക്ട്രിക് വാഹനങ്ങളിൽ (ഇവി) ഉപയോഗിക്കുന്ന പെർമനന്റ് മാഗ്നറ്റ് സിൻക്രണസ് മോട്ടോറുകളിൽ (പിഎംഎസ്എം) അപൂർവ എർത്ത് കാന്തങ്ങൾ അവിഭാജ്യ ഘടകങ്ങൾ ആണ്. ഉയർന്ന ടോർക്ക്, ഊർജ്ജ കാര്യക്ഷമത തുടങ്ങിയവയ്ക്കും ഇവ സഹായിക്കുന്നു. ഫലപ്രദമായ പ്രൊപ്പൽഷനും ഹൈബ്രിഡുകൾ ഈ കാന്തങ്ങളെ ആശ്രയിക്കുന്നു. ഈ അപൂർവ്വ കാന്തങ്ങളുടെ ആഗോള സംസ്കരണ ശേഷിയുടെ 90 ശതമാനത്തിലധികവും നിയന്ത്രിക്കുന്നത് ചൈനയാണ്.
Whatsapp Group 1 | Whatsapp Group 2 |Telegram Group
ജനുവരിയിൽ നടന്ന ഇന്ത്യയുടെ കാർ ഷോയിൽ ഏറെ ശ്രദ്ധിക്കപ്പെട്ട മോഡലായിരുന്നു ഇ-വിറ്റാര. ഇത് രാജ്യത്ത് മാരുതിയുടെ ഇവി മുന്നേറ്റത്തിന് നിർണായകമാണ്. കഴിഞ്ഞ വർഷത്തെ ഏകദേശം 2.5% ആയിരുന്നത് 2030 ആകുമ്പോഴേക്കും പ്രധാനമന്ത്രി നരേന്ദ്ര മോദിയുടെ സർക്കാർ മൊത്തം കാർ വിൽപ്പനയുടെ 30% ആയി വളർത്താൻ ആഗ്രഹിക്കുന്ന ഒരു വിഭാഗത്തിലേക്കുള്ള പ്രവേശനമാണിത്.
