ഉത്തരേന്ത്യയിൽ ഉഷ്ണ തരംഗം രൂക്ഷം: ഹിമാലയ യാത്രയ്ക്കിടെ മലയാളി സൂര്യാഘാതമേറ്റ് മരിച്ചു

കൊച്ചി: ഹിമാലയ യാത്രയ്ക്കിടെ പെരുമ്പാവൂർ സ്വദേശി സൂര്യാഘാതമേറ്റ് മരിച്ചു. പെരുമ്പാവൂർ അഞ്ജനം വീട്ടിൽ ഉണ്ണികൃഷ്ണനാണ് (58) മരിച്ചത്. വ്യാഴാഴ്ച ഉത്തർപ്രദേശിലെ പ്രയാഗ്രാജില്‍ (പഴയ അലഹബാദ്) വെച്ചാണ് സംഭവം. ഒരാഴ്ച മുൻപാണ് ഉണ്ണിക്കൃഷ്ണൻ പെരുമ്പാവൂരിൽ നിന്ന് ഹിമാലയ യാത്രയ്ക്കായി പുറപ്പെട്ടത്.

മൃതദേഹം ഇപ്പോള്‍ പ്രയാഗ്രാജിലെ ആശുപത്രിയില്‍ സൂക്ഷിച്ചിരിക്കുകയാണ്. നടപടികള്‍ പൂർത്തിയാക്കി മൃതദേഹം നാട്ടിലെത്തിക്കാനുള്ള ശ്രമത്തിലാണ് ബന്ധുക്കളും അലഹബാദിലെ മലയാളി സമാജം പ്രവർത്തകരും.

ഉത്തരേന്ത്യയില്‍ കടുത്ത ചൂടും ഉഷ്ണതരംഗവും തുടരുകയാണ്. കഴിഞ്ഞ ദിവസം ഡല്‍ഹിയില്‍ റെക്കോർഡ് ചൂട് രേഖപ്പെടുത്തിയിരുന്നു.