മലയാള സിനിമയിലെ ഒരു പ്രമുഖ നടൻ വലിയ തെറ്റിന് തിരി കൊളുത്തിയിട്ടുണ്ടെന്നു പേരുപറയാതെയുള്ള വെളിപ്പെടുത്തലുമായി നിർമാതാവ് ലിസ്റ്റിൻ സ്റ്റീഫൻ: ഇനിയും ആ തെറ്റ് തുടർന്നു കഴിഞ്ഞാല്‍ വലിയ പ്രശ്നങ്ങള്‍ക്കു കാരണമാകുമെന്നും നടന്റെ പേരെടുത്തു പറയാതെ ലിസ്റ്റിൻ പറഞ്ഞു.
കൊച്ചി: മലയാള സിനിമയിലെ ഒരു പ്രമുഖ നടൻ വലിയ തെറ്റിന് തിരി കൊളുത്തിയിട്ടുണ്ടെന്നു പേരുപറയാതെയുള്ള വെളിപ്പെടുത്തലുമായി നിർമാതാവ് ലിസ്റ്റിൻ സ്റ്റീഫൻ.
ഇനിയും ആ തെറ്റ് തുടർന്നു കഴിഞ്ഞാല്‍ വലിയ പ്രശ്നങ്ങള്‍ക്കു കാരണമാകുമെന്നും നടന്റെ പേരെടുത്തു പറയാതെ ലിസ്റ്റിൻ പറഞ്ഞു. ദിലീപ് നായകനായെത്തുന്ന പ്രിൻസ് ആൻ‍ഡ് ഫാമിലി എന്ന സിനിമയുടെ പ്രൊമോഷൻ പരിപാടികള്‍ക്കിടെയായിരുന്നു ഒരു നടനെതിരെ ലിസ്റ്റിൻ രംഗത്തെത്തിയത്. എന്നാല്‍ ലിസ്റ്റിനു പേര് പറയാൻ നട്ടെല്ലുവേണമെന്നാണ് സോഷ്യല്‍മീഡിയയില്‍ വരുന്ന കമന്റുകള്‍.
ലിസ്റ്റിന്റെ വാക്കുകള്‍ ഇങ്ങനെയായിരുന്നു-“ഞാൻ മലയാള സിനിമയില്‍ വന്നിട്ട് പതിനഞ്ച് വർഷമായി. ഇന്നും കുറേയധികം സിനിമകള്‍ ചെയ്തിട്ടുണ്ട്. പക്ഷേ മലയാള സിനിമയിലെ ഒരു പ്രമുഖ നടൻ വലിയ തെറ്റിലേക്ക് ഇന്ന് തിരികൊളുത്തിയിട്ടുണ്ട്. വലിയ മാലപ്പടക്കത്തിന് ഇന്ന് തിരി കൊളുത്തിയിരിക്കുകയാണ്. അത് വേണ്ടായിരുന്നു. ഞാൻ ഇത് പറയുമ്പോള്‍, ആ നടൻ ഇത് കാണും.
പക്ഷേ ആ നടൻ ചെയ്തത് വലിയ തെറ്റാണ് എന്ന് ഞാൻ ഓർമിപ്പിക്കുകയാണ്. ഇനിയും ആ തെറ്റ് തുടരരുത്, ആവർത്തിക്കരുത്. കാരണം അങ്ങനെ തുടർന്നു കഴിഞ്ഞാല്‍ അത് പല വലിയ പ്രശ്നങ്ങള്‍ക്കും കാരണമായി തീരും”.
അതേസമയം ലിസ്റ്റിൻ നിർമിക്കുന്ന സിനിമയുടെ ഭാഗമായിരുന്നു ഈ നടനെന്നും എന്നാല്‍ ചിത്രത്തിന്റെ ഷെഡ്യൂള്‍ തുടരുന്നതിനിടെ നടൻ മറ്റൊരു സിനിമയില്‍ ജോയിൻ ചെയ്തതാണ് പ്രശ്നങ്ങള്‍ക്ക് കാരണമെന്നാണ് പുറത്തുവരുന്ന റിപ്പോർട്ട്. കഴിഞ്ഞ ഒരു പതിറ്റാണ്ടായി മലയാള സിനിമയില്‍ നിറഞ്ഞു നില്‍ക്കുന്ന നടനാണിതെന്നും സ്വന്തമായി പ്രൊഡക്ഷൻ കമ്പനി തുടങ്ങിയിരുന്നു.
Whatsapp Group 1 | Whatsapp Group 2 |Telegram Group
പക്ഷെ തുടർച്ചയായി സിനിമകള്‍ പരാജയപ്പെട്ടതോടെ സാമ്പത്തിക പ്രതിസന്ധിയില്‍ ആയെന്നും അതുകൊണ്ടാണ് ലിസ്റ്റിന്റെ സിനിമയില്‍ നിന്ന് അവധി ചോദിച്ച്‌ മറ്റൊരു സിനിമയില്‍ ജോയിൻ ചെയ്തതെന്നും നടനുമായി ബന്ധപ്പെട്ട അടുത്ത വൃത്തങ്ങളെ ഉദ്ധരിച്ചു കൊണ്ട് മാധ്യമങ്ങള്‍ റിപ്പോർട്ട് ചെയ്യുന്നു. എന്നാല്‍ ഇക്കാര്യത്തില്‍ ഇതുവരെ നടന്റെ ഭാഗത്തു നിന്ന് പ്രതികരണമൊന്നും ഉണ്ടായിട്ടില്ല.
അതേസമയം വിഷയത്തില്‍ ലിസ്റ്റിനെ വിമർശിച്ച്‌ നിരവധി ആളുകള്‍ സോഷ്യല്‍ മീഡിയയിലൂടെ രംഗത്തെത്തുന്നുണ്ട്. കൃത്യമായി കാരണം പറയാതെയുള്ള ഇത്തരം ഒളിയമ്പുകള്‍ ആശയക്കുഴപ്പം സൃഷ്ടിക്കാനേ ഉപകരിക്കുകയുള്ളൂവെന്നും പലരും പറയുന്നു.
കൂടാതെ ലിസ്റ്റിൻ പറഞ്ഞ നടൻ നിവിൻ പോളിയാണെന്നും സോഷ്യല്‍ മീഡിയയില്‍ കമന്റുകള്‍ വരുന്നുണ്ട്.
ലിസ്റ്റിൻ നിർമിക്കുന്ന ബേബി ഗേള്‍ എന്ന സിനിമയുടെ ഷൂട്ടിങ് സെറ്റില്‍ നിന്നിറങ്ങി നിവിൻ പോളി അഖില്‍ സത്യന്റെ ചിത്രത്തില്‍ ജോയിൻ ചെയ്തുവെന്നും ഇതാണ് ലിസ്റ്റിൻ സ്റ്റീഫന്റെ താക്കീതിന് കാരണമെന്നും സോഷ്യല്‍ മീഡിയയില്‍ കമന്റുകള്‍ നിറയുന്നുണ്ട്.
