2026 ൽ മൂന്ന് പുതിയ ഇലക്ട്രിക് യൂട്ടിലിറ്റി വാഹനങ്ങൾ പുറത്തിറക്കാൻ ഒരുങ്ങി മഹീന്ദ്ര; ഏതൊക്കെയെന്ന് അറിയാം!

2026 സാമ്പത്തിക വർഷത്തിൽ, മൂന്ന് പുതിയ യൂട്ടിലിറ്റി വാഹനങ്ങൾ പുറത്തിറക്കാൻ ഒരുങ്ങുകയാണ് മഹീന്ദ്ര. ഈ വർഷം കമ്പനി ഏറെക്കാലമായി കാത്തിരുന്ന XUV700 ഇലക്ട്രിക് എസ്‌യുവി അവതരിപ്പിക്കും. അതിന്റെ പേര് മഹീന്ദ്ര XEV 7e എന്നായിരിക്കും.

ഇതിനുപുറമെ, ബിഇ റാൾ – ഇ അടിസ്ഥാനമാക്കിയുള്ള സ്‌പോർട്ടി ഇലക്ട്രിക് എസ്‌യുവിയും XUV 3XO യുടെ ഇലക്ട്രിക് പതിപ്പും കമ്പനി സജീവമായി പരീക്ഷിച്ചുവരികയാണ്. ഈ സാമ്പത്തിക വർഷം മഹീന്ദ്ര XEV 7e, BE 6 റാൾ-ഇ അടിസ്ഥാനമാക്കിയുള്ള റഗ്ഡ് ഇലക്ട്രിക് എസ്‌യുവി, എൻട്രി ലെവൽ XUV 3XO EV എന്നിവ പുറത്തിറക്കും. XEV 7e നമ്മുടെ വിപണിയിലെത്തുന്ന ആദ്യ മോഡലായിരിക്കാം. കൂടാതെ ഇത് ഒരു പ്രായോഗിക 7-സീറ്റർ ഇലക്ട്രിക് ഓഫറായി വിപണനം ചെയ്യപ്പെടും. ഈ മോഡലുകളെക്കുറിച്ച് വിശദമായി അറിയാം.

മഹീന്ദ്ര XEV 7e
2022-23 ൽ അനാച്ഛാദനം ചെയ്ത മഹീന്ദ്ര XUV.e8 ന്റെ പ്രൊഡക്ഷൻ പതിപ്പാണിത്. ചില ഇവി നിർദ്ദിഷ്ട മാറ്റങ്ങൾ ഒഴികെ, ഇലക്ട്രിക് എസ്‌യുവി മഹീന്ദ്ര XUV 700 ന് സമാനമായിരിക്കും. ഇതിന്റെ മുൻവശത്തെ രൂപകൽപ്പന XEV 9e യിൽ നിന്ന് പ്രചോദനം ഉൾക്കൊണ്ടതാണ്. എൽ ആകൃതിയിലുള്ള കണക്റ്റഡ് എൽഇഡി ഡിആർഎല്ലുകളും താഴത്തെ ബമ്പറിൽ സ്ഥാപിച്ചിരിക്കുന്ന പ്രധാന ഹെഡ്‌ലൈറ്റുകളുള്ള ഒരു സ്പ്ലിറ്റ് ഹെഡ്‌ലാമ്പ് സജ്ജീകരണവും ഇതിൽ ഉൾപ്പെടുന്നു. എയറോ-ഒപ്റ്റിമൈസ് ചെയ്ത വീലുകളും റാപ്പ് എറൗണ്ട് LED ടെയിൽ-ലൈറ്റുകളും ഇതിന് ഉണ്ടായിരിക്കും.

ഇന്‍റീരിയർ അപ്‌ഗ്രേഡുകൾ
മഹീന്ദ്ര XEV 9e യിൽ നിന്ന് പ്രചോദനം ഉൾക്കൊണ്ടാണ് ക്യാബിൻ ഡിസൈൻ . ഡ്യുവൽ-ടോൺ ബ്ലാക്ക് ആൻഡ് വൈറ്റ് സ്കീമും സെന്റർ കൺസോളിൽ കോൺട്രാസ്റ്റിംഗ് പിയാനോ ബ്ലാക്ക് ഫിനിഷും ഇതിൽ ഉൾപ്പെടുന്നു. 12.3 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് യൂണിറ്റ്, 12.3 ഇഞ്ച് ഡിജിറ്റൽ ഡ്രൈവർ ഡിസ്‌പ്ലേ, പാസഞ്ചർ ഡിസ്‌പ്ലേ എന്നിവ ഉൾപ്പെടുന്ന ട്രിപ്പിൾ സ്‌ക്രീൻ സജ്ജീകരണത്തോടെയാണ് ഇത് വരുന്നത്.

പ്രധാന സവിശേഷതകൾ
മൾട്ടി-സോൺ ക്ലൈമറ്റ് കൺട്രോൾ, പ്രീമിയം 16-സ്പീക്കർ ഹർമൻ കാർഡൺ സൗണ്ട് സിസ്റ്റം, മെമ്മറി ഫംഗ്ഷനും വെന്റിലേഷനും ഉള്ള ഇലക്ട്രിക്കലി അഡ്ജസ്റ്റ് ചെയ്യാവുന്ന ഫ്രണ്ട് സീറ്റുകൾ, പനോരമിക് സൺറൂഫ് തുടങ്ങിയ സവിശേഷതകൾ ഈ ഇലക്ട്രിക് എസ്‌യുവിയിൽ ഉണ്ടാകുമെന്ന് പ്രതീക്ഷിക്കാം. 12 അൾട്രാസോണിക് സെൻസറുകൾ ഉപയോഗിച്ച് അനുയോജ്യമായ പാർക്കിംഗ് സ്ഥലം കണ്ടെത്തി സ്വയം പാർക്ക് ചെയ്യുന്ന ഓട്ടോ പാർക്ക് സവിശേഷതയും ഇതിലുണ്ടാകും. സുരക്ഷാ സവിശേഷതകളിൽ ലെവൽ 2 ADAS, 7 എയർബാഗുകൾ, 360-ഡിഗ്രി സറൗണ്ട് വ്യൂ ക്യാമറ, ഓട്ടോ ഹോൾഡുള്ള ഇലക്ട്രോണിക് പാർക്കിംഗ് ബ്രേക്ക്, ഒരു ടിപിഎംഎസ് എന്നിവ ഉൾപ്പെടും.

ബാറ്ററി സവിശേഷതകൾ
XEV 7e -യിൽ 59kWh, 79kWh ബാറ്ററി ഓപ്ഷനുകൾക്കൊപ്പം റിയർ-ആക്‌സിൽ-മൗണ്ടഡ് ഇലക്ട്രിക് മോട്ടോർ സ്റ്റാൻഡേർഡായി നൽകാനാണ് സാധ്യത. ഒറ്റ ചാർജിൽ 500 കിലോമീറ്ററിലധികം MIDC റേഞ്ച് ഈ എസ്‌യുവി വാഗ്ദാനം ചെയ്യും. ഉയർന്ന പവറും ടോർക്കും ഔട്ട്‌പുട്ടും ഉള്ള ഡ്യുവൽ-മോട്ടോർ AWD സജ്ജീകരണവും എസ്‌യുവിക്ക് ലഭിക്കാൻ സാധ്യതയുണ്ട്.

വിലയും ലോഞ്ച് വിശദാംശങ്ങളും
പുതിയ മഹീന്ദ്ര XEV 7e യുടെ വില 20.9 ലക്ഷം മുതൽ 30 ലക്ഷം രൂപ വരെയാകുമെന്ന് പ്രതീക്ഷിക്കുന്നു. കൃത്യമായ ലോഞ്ച് ടൈംലൈൻ ഇതുവരെ പ്രഖ്യാപിച്ചിട്ടില്ല, എന്നാൽ ഉത്സവ സീസണോടെ ദീപാവലിയോട് അടുത്ത് എസ്‌യുവി വിൽപ്പനയ്‌ക്കെത്തുമെന്ന് വിവിധ റിപ്പോർട്ടുകൾ സൂചിപ്പിക്കുന്നു.

മഹീന്ദ്ര ബിഇ റാൾ-ഇ
നിലവിൽ വിപണിയി ഉള്ള BE 6 ന്റെ സ്‌പോർട്ടി പതിപ്പായ  ബിഇ റാൾ-ഇ അധിഷ്ഠിത ഇലക്ട്രിക് എസ്‌യുവിയും പരീക്ഷിച്ചുവരികയാണ്. കഴിഞ്ഞ വർഷം ഹൈദരാബാദിൽ നടന്ന മഹീന്ദ്ര EV ഫാഷൻ ഫെസ്റ്റിവലിൽ കമ്പനി  ബിഇ റാൾ-ഇ കൺസെപ്റ്റ് പ്രദർശിപ്പിച്ചിരുന്നു.

ഡിസൈനും ഇന്‍റീരിയറും
പ്രൊഡക്ഷൻ-സ്പെക്ക് BE റാൾ-ഇ യഥാർത്ഥ ആശയത്തിന് സമാനമായി കാണപ്പെടുമെന്ന് സ്പൈ ചിത്രങ്ങൾ സൂചിപ്പിക്കുന്നു. എങ്കിലും ഇതിന് ചില ഡിസൈൻ മാറ്റങ്ങൾ വരുത്തിയേക്കാം. ചെറുതും കൂടുതൽ ആക്രമണാത്മകവുമായ ഫ്രണ്ട്, റിയർ ബമ്പറുകൾക്കൊപ്പം പ്രമുഖ വീൽ ആർച്ചുകളും റൂഫ് കാരിയറും ഇതിൽ ഉണ്ടാകും. ഇലക്ട്രിക് എസ്‌യുവി കൂപ്പെയ്ക്ക് കട്ടിയുള്ള ടയറുകൾ ലഭിക്കും. വാഹനത്തിന്‍റെ ഇന്‍റീരിയർ വിശദാംശങ്ങൾ ഇതുവരെ വെളിപ്പെടുത്തിയിട്ടില്ല, പക്ഷേ ഇത് മഹീന്ദ്ര BE 6 ന്റെ ഡാഷ്‌ബോർഡ് ലേഔട്ട് പങ്കിടാൻ സാധ്യതയുണ്ട്. ഇൻഫോടെയ്ൻമെന്റ്, ഡിജിറ്റൽ ഡ്രൈവർ ഡിസ്‌പ്ലേ, ഓട്ടോമാറ്റിക് ക്ലൈമറ്റ് കൺട്രോൾ, വെന്റിലേറ്റഡ് ഫ്രണ്ട് സീറ്റുകൾ എന്നിവയ്‌ക്കായി കണക്റ്റഡ് സ്‌ക്രീൻ എസ്‌യുവിയിൽ ഉണ്ടായിരിക്കും.

ബാറ്ററി സവിശേഷതകൾ
സ്പോർട്ടി ഇവിയിൽ 79kWh ബാറ്ററി പായ്ക്ക്, ഡ്യുവൽ-മോട്ടോർ ഓൾ വീൽ ഡ്രൈവ് സജ്ജീകരണം എന്നിവ ഘടിപ്പിക്കാൻ സാധ്യതയുണ്ട്. ഒറ്റ ചാർജിൽ 500 കിലോമീറ്ററിലധികം ദൂരം ഇത് വാഗ്ദാനം ചെയ്യുമെന്ന് പ്രതീക്ഷിക്കുന്നു.

മഹീന്ദ്ര XUV 3XO EV
ടാറ്റ നെക്‌സോൺ ഇവിയുടെ നേരിട്ടുള്ള എതിരാളിയാകുന്ന XUV 3XO അടിസ്ഥാനമാക്കിയുള്ള എൻട്രി ലെവൽ ഇലക്ട്രിക് എസ്‌യുവിയും തദ്ദേശീയ യുവി നിർമ്മാതാക്കൾ പരീക്ഷിച്ചുവരികയാണ്. XUV400, ICE-ൽ പ്രവർത്തിക്കുന്ന XUV 3XO എന്നിവയ്ക്ക് അടിസ്ഥാനമായ അതേ ഐസിഇ കൺവേർട്ടഡ് പ്ലാറ്റ്‌ഫോമിനെ അടിസ്ഥാനമാക്കിയായിരിക്കും ഈ ഇലക്ട്രിക് എസ്‌യുവിയും നിർമ്മിക്കുന്നത്.

ഡിസൈനും ഇന്റീരിയർ അപ്‌ഗ്രേഡുകളും
മഹീന്ദ്ര XUV 3XO EV-യിൽ ഇവിയ്‌ക്കുള്ള പ്രത്യേക ഫ്രണ്ട് ഗ്രിൽ, പുതുക്കിയ ഫ്രണ്ട്, റിയർ ബമ്പറുകൾ, പുതിയ എയറോ-ഒപ്റ്റിമൈസ് ചെയ്ത വീലുകൾ, പുതിയ ബാഡ്ജിംഗ് തുടങ്ങിയ ചെറിയ സൗന്ദര്യവർദ്ധക മാറ്റങ്ങൾ ലഭിക്കാൻ സാധ്യതയുണ്ട്. ഇലക്ട്രിക് എസ്‌യുവി അതിന്റെ മിക്ക സവിശേഷതകളും ഐസിഇ മോഡലുമായി പങ്കിടും. 10.25 ഇഞ്ച് ഡിജിറ്റൽ ഇൻസ്ട്രുമെന്റ് കൺസോൾ, 12.3 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് യൂണിറ്റ്, പനോരമിക് സൺറൂഫ്, ഹർമൻ കാർഡൺ സൗണ്ട് സിസ്റ്റം, ഫ്രണ്ട് പാർക്കിംഗ് സെൻസറുകൾ, ഓട്ടോ ഹോൾഡുള്ള ഇലക്ട്രോണിക് പാർക്കിംഗ് ബ്രേക്ക്, ലെവൽ 2 ADAS തുടങ്ങിയവ ഫീച്ചർ ലിസ്റ്റിൽ ഉൾപ്പെട്ടേക്കാം. പുതിയ XUV 3XO EV ഒരു ചെറിയ 35kWh ബാറ്ററി പായ്ക്ക് ഉപയോഗിച്ച് വാഗ്ദാനം ചെയ്യാൻ സാധ്യതയുണ്ട്; എന്നിരുന്നാലും, അതിന്റെ ഇലക്ട്രിക് മോട്ടോറിനെയും റേഞ്ചിനെയും കുറിച്ചുള്ള വിശദാംശങ്ങളൊന്നുമില്ല. ഒറ്റ ചാർജിൽ ഏകദേശം 400 കിലോമീറ്റർ റേഞ്ച് പുതിയ മോഡൽ വാഗ്ദാനം ചെയ്യുമെന്ന്  പ്രതീക്ഷിക്കുന്നു.