‘എന്റെ സത്യാന്വേഷണ പരീക്ഷണങ്ങൾ’ക്ക് ഗാന്ധിജിയുടെ ജന്മനാടായ ഗുജറാത്തിലേതിനേക്കാൾ വായനക്കാർ കേരളത്തിൽ
സ്വന്തം ലേഖകൻ
അഹമദാബാദ്: ഗാന്ധിയുടെ ആത്മകഥയായ എന്റെ സത്യാന്വേഷണ പരീക്ഷണങ്ങൾ (The Story of My Experiments With Truth)ക്ക് ഗുജറാത്തിലേക്കാൾ അധികം വായനക്കാർ കേരളത്തിലെന്ന് കണക്കുകൾ. ആത്മകഥയുടെ ഗുജറാത്തി പതിപ്പിനേക്കാൾ വിറ്റു പോയത് മലയാളം, തമിഴ് പരിഭാഷകളാണ്.
1927ൽ നവ്ജീവൻ ട്രസ്റ്റ് ഗുജറാത്തിയിൽ പ്രസിദ്ധീകരിച്ച പുസ്തകത്തിന്റെ 620,000 കോപ്പികളാണ് ഈ വർഷം ജൂലായ് വരെ വിറ്റഴിഞ്ഞത്. ഏറ്റവും അധികം കോപ്പികൾ വിറ്റഴിഞ്ഞത് ഇംഗ്ലീഷിലാണ്. 1927ൽ തന്നെ പുറത്തിറങ്ങിയ ആത്മകഥയുടെ ഇംഗ്ലീഷ് പതിപ്പിന്റെ 2,042,500 കോപ്പികളാണ് ഇത് വരെ വിറ്റഴിഞ്ഞത്.
Whatsapp Group 1 | Whatsapp Group 2 |Telegram Group
പുസ്തകത്തിന്റെ ഹിന്ദി പതിപ്പ് 1957ലാണ് പുറത്തിറക്കുന്നത്. ഹിന്ദി പതിപ്പിന്റെ 643,000 കോപ്പികളാണ് ഈ വർഷം ജൂലായ് വരെ വിറ്റു പോയത്. എന്നാൽ 1994ൽ മാത്രം പുറത്തിറങ്ങിയ പുസ്തകത്തിന്റെ തമിഴ് പതിപ്പ് ഇതു വരെ 700,000 കോപ്പികൾ വിറ്റു പോയി.
അതിനു ശേഷം 1997ലാണ് ആത്മകഥയുടെ മലയാളം പതിപ്പ് പുറത്തിറങ്ങുന്നത്. ഇതു വരെ ആത്മകഥയുടെ മലയാളം പതിപ്പിന്റെ 778,000 കോപ്പികളാണ് വിറ്റഴിഞ്ഞത്. കേരളത്തിലെ ഉയർന്ന സാക്ഷരതാ നിരക്കും വായനാ ശീലവുമാണ് ഇതിനുള്ള കാരണമായി നവ്ജീവൻ ട്രസ്റ്റിയുടെ മാനേജിങ്ങ് ട്രസ്റ്റി ചൂണ്ടിക്കാട്ടുന്നത്. ‘കേരളത്തിലെ ഞങ്ങളുടെ വിതരണക്കാർ ഒരു ലക്ഷം കോപ്പികൾ കൂടി ചോദിച്ചിട്ടുണ്ട്’- അദ്ദേഹം പറഞ്ഞു.
