ലൂർദിയൻ ബാസ്‌കറ്റ് ബോൾ ടൂർണമെൻ്റ ചൊവ്വാഴ്‌ച( ആഗസ്റ്റ് 6) കോട്ടയത്ത് തുടങ്ങും:ആഗസ്റ്റ് 9 – ന് ഫൈനൽ .

കോട്ടയം: കേരളത്തിലെ പ്രശസ്‌ത ഇൻ്റർസ്‌കൂൾ ബാസ്‌കറ്റ് ബോൾ ചാമ്പ്യൻഷിപ്പായ ലൂർദിയൻ ബാസ്‌കറ്റ് ബോൾ ടൂർണമെൻ്റ് ഓഗസ്റ്റ് 06 ചൊവ്വാഴ്‌ച ആരംഭിക്കും. കോട്ടയം ലൂർദ് പബ്ലിക് സ്‌കൂളിലെ ബിഷപ്പ് ചാൾസ് ലവീഞ് മെമ്മോറിയൽ -ഇൻഡോർ സ്റ്റേഡിയത്തിലാണ് മത്സരങ്ങൾ. സംസ്ഥാനത്തിൻ്റെ വിവിധ ഭാഗങ്ങളിൽ നിന്നായി 30 ൽ അധികം ടീമുകൾ പങ്കെടുക്കും.

ഓഗസ്റ്റ് 06 ചൊവ്വാഴ്‌ച 2 മണിക്ക് ലൂർദ് സ്‌കൂൾ മാനേജർ റവ. ഡോ. ഫിലിപ്പ് നെൽപുരപറമ്പിലിന്റെ അധ്യക്ഷതയിൽ നടക്കുന്ന ചടങ്ങിൽ കോട്ടയം ജില്ലാ പോലീസ് മേധാവി കെ. കാർത്തിക് ഐ പി എസ് 19-ാ മത് ലൂർദിയൻ ബാസ്‌കറ്റ് ബോൾ ടൂർണമെന്റ്റ് ഉത്ഘാടനം ചെയ്യും. ചടങ്ങിൽ പ്രിൻസിപ്പാൾ റവ. ഫാ. തോമസ് പാറത്താനം, പി.ടി.എ പ്രസിഡൻ്റ് . എസ്. ഗോപകുമാർ, വൈസ് പ്രിൻസിപ്പാൾ ആൻസമ്മ ജോസഫ് എന്നിവർ ആശംസകൾ നേർന്നു സംസാരിക്കും.

09-ാം തിയതി വൈകുന്നേരം 4 മണിക്ക് ഫൈനൽ മത്സരങ്ങൾ ആരംഭിക്കും. തുടർന്ന് 6.30 നു നടക്കുന്ന സമാപന സമ്മേളനം കോട്ടയം ജില്ലാ കളക്ടർ ജോൺ വി സാമുവൽ ഐ എ എസ് ഉത്ഘാടനം ചെയ്യുകയും വിജയികൾക്ക് സമ്മാനങ്ങൾ നൽകുകയും ചെയ്യും.

ടൂർണമെന്റിനുള്ള എല്ലാ ഒരുക്കങ്ങളും പൂർത്തിയായതായി ലൂർദ് സ്‌കൂൾ പ്രിൻസിപ്പാൾ റവ. ഫാ. തോമസ് പാറത്താനം, പി.ടി.എ. പ്രസിഡൻ്റ് എസ്. ഗോപകുമാർ, ടൂർണമെൻ്റ് കൺവീനർ കെ ജോസ് തോമസ് കൊട്ടാരത്തറ കായികാധ്യാപകരായ അഖിൽ പി അരവിന്ദ്, മെവിൻ സജി, മെറി റോസ് മാത്യു, കോച്ച് ഇടിക്കുള ടി പോൾ എന്നിവർ വാർത്താ സമ്മേളനത്തിൽ അറിയിച്ചു.

ടൂർണമെന്റുമായി ബന്ധപ്പെട്ട് മാധ്യമങ്ങളിൽ പ്രസിദ്ധീകരിക്കുന്ന ഏറ്റവും മികച്ച സ്പോർട്‌സ് വാർത്താ ചിത്രത്തിന് മുൻ വർഷങ്ങളിലേതു പോലെ ഇത്തവണയും അവാർഡ് നൽകും.